अनलाइन डबली
काठमाडौँ । प्रतिनिधिसभा र प्रदेश सभाको निर्वाचनमा गठबन्धन बनाएर जाने कसरत गरिरहेका सत्तारुढ पाँच दलका नेताहरू दुई पक्षीय र त्रिपक्षीय बैठकमा जुटेका छन् ।
एउटै निर्वाचन क्षेत्रमा दाबी गर्ने दुई-तीन दलका नेताहरूबीच प्रधानमन्त्री निवास बालुवाटारमा छलफल भइरहेको सञ्चार तथा सूचना प्रविधिमन्त्री तथा कांग्रेस नेता ज्ञानेन्द्रबहादुर कार्कीले बताए ।
सत्तारुढ गठबन्धनका नेताहरू सिट बाँडफाँटमा सहमति नजिक पुगेको कार्कीले जानकारी दिए । ‘निर्णयको नजिकमा सहमतिपूर्ण तरिकाले गएका छौं । सबैले लचिलो हुनुको विकल्प छैन तर दलहरूको आ-आफ्नो अडान छ । ती अडानमा सूक्ष्म ढंगले छलफल गरेर अगाडि बढेका छौं,’ उनले भने ।
दलका नेताहरूबीच कुन क्षेत्र कसले लिने भन्नेबारे छलफल भइरहेकाले तत्काल निष्कर्ष निस्कने संभावना नरहेको कार्कीले संकेत गरे ।
‘दुई पक्षीय र त्रिपक्षीय छलफल चलिरहेको छ । अझै छलफल बाँकी रहन्छ,’ उनले भने । एउटै निर्वाचन क्षेत्रमा दाबी गर्ने दलहरूबीच छलफल भइरहेको कार्कीले जानकारी दिए ।
उनले भने, ‘एउटै सिटमा दुई, तीन दलले दाबी गरेका छन् । त्यो सबै मिलाएर एक जना मात्रै गठबन्धनको उम्मेदवार बनाउनका लागि दुईपक्षीय र त्रिपक्षीय छलफल भइरहेको छ ।’
