अनलाइन डबली
काठमाडौँ । सत्ता गठबन्धनमा आबद्ध दलहरुबीच सिट बाँडफाँटको मोडालिटी तयार गर्न बनेको कार्यदलको बैठकमा प्रदेशसभा निर्वाचन क्षेत्रमा हुने भागबण्डाबारे पनि छलफल सुरु भएको छ ।
यसअघिका कार्यदलका बैठकमा प्रतिनिधिसभा निर्वाचन क्षेत्रको बाँडफाँटबारे मात्रै छलफल हुने गरेकामा शुक्रबारदेखि प्रदेशतर्फ पनि छलफल सुरु भएको हो ।
शुक्रबार प्रधानमन्त्री निवास बालुवाटारमा बसेको कार्यदलको बैठकमा प्रदेशतर्फ पनि बाँडफाँट कसरी गर्ने भन्नेबारे छलफल सुरु भएको सञ्चारमन्त्री तथा कार्यदलका सदस्य ज्ञानेन्द्र बहादुर कार्कीले जानकारी दिए । तर, ठोस सहमति नबनेको भन्दै उनले यसबारे छलफलका लागि आइतबार पुनः बैठक बोलाइएको बताए ।
उनले अहिले दलहरूबाट आफ्नो हिसावले दाबी प्रस्तुत गर्नु स्वाभाविक भएको प्रतिक्रिया दिँदा यसलाई रियालिस्टिक गा्रउण्डमा राखेर छलफल गरेर टुंगोमा पुगिने बताए । प्रतिनिधिसभा र प्रदेशसभामा भागबण्डा गर्दा सकेसम्म फरक दलबाट प्रतिनिधित्व हुनेगरी व्यवस्था मिलाइने उनको भनाइ छ ।
उनले गठबन्धनको बलमा सबै दलमा धेरै सिट पाऔँ र जितौँ भन्ने लाग्नु स्वाभाविक भएको उल्लेख गर्दै यथार्थ पहिल्याएर त्यसबारे प्रतिवेदन तयार गरी नेतृत्वलाई बुझाइने बताए । उनले सिटको बाँडफँटसँगै गठबन्धनको साझा अवधारणा पनि बनाइने बैठकपछि बताए ।
प्रतिनिधिसभातर्फ काँग्रेसले १००, माओवादीले ६०, एकीकृत समाजवादीले ४०, जसपाले ३२ तथा जनमोर्चाले २ सिट दाबी गरेको छ । तर, प्रदेशसभामा भने छलफल सुरु भएकाले दाबीबारे सञ्चारमन्त्रीले प्रष्ट खुलाएका छैनन् । सत्ता गठबन्धनमा सिट फाँडफाँटका लागि सहमति जुटाउन कार्यदल र शीर्ष तहमा समेत पटक पटक छलफल हुँदै आएको छ ।
