अनलाइन डबली
काठमाडौँ । राष्ट्रपति विद्यादेवी भण्डारीकी छोरी उषाकिरण भण्डारी पछिल्लो समय मदन भण्डारी फाउण्डेसनमा सक्रिय छिन्। उनी (नेकपा एमाले) को काठमाडौं जिल्ला कमिटी सदस्य पनि हुन्।
यसैबीच मंसिर ४ मा हुने प्रतिनिधि सभा निर्वाचनमा काठमाडौं क्षेत्र नम्बर २ बाट उनले उम्मेदवारी दिने तयारी गरेको खबर सार्वजनिक भइरहेका छन्। उक्त खबरले उषाकिरण निकै हैरानीमा परेको बताइन्।
प्रतिनिधि सभा वा प्रदेश सभा निर्वाचनमा लड्ने कुनै पनि योजना नरहेको उनको भनाइ छ। सार्वजनिक भइरहेका खबर अफवाह रहेको भण्डारीको जिकिर छ।
‘म चुनाव लड्दैछु भनेर गरिएका प्रचारले इरिटेट भइसकेँ। संसदीय चुनावमा प्रत्यक्ष लड्ने वा समानुपातिकमा बस्ने विषयमा मेरो कुनै रूचि छैन। काठमाडौं-२ मा लड्ने भन्ने कुरा निराधार हो,’ उनले भनिन्।
आफू मदन भण्डारी फाउण्डेसनमै केन्द्रित हुने उनले बताइन्। ‘मेरो लगाव नै फाउण्डेसनप्रति छ। सक्रिय राजनीतिमा आउने मेरो सोच छैन। आफ्नो अध्ययन र क्षमता अनुसारको काम मैले गरिरहेको छु,’ उनले भनिन्।
भण्डारी नेकपा एमालेको महिला संगठन अखिल नेपाल महिला संघको विदेश विभाग सदस्य पनि हुन्। २०७८ चैत ५ मा उनी मदन भण्डारी फाउण्डेसनको अध्यक्षमा चयन भएकी थिइन्।
