अनलाइन डबली
काठमाडौँ । गृहमन्त्री बालकृष्ण खाणले आमाको नामबाट छोराछोरीले नागरिकता लिँदा बाबुको पहिचान खुलाउनुपर्ने बताएका छन् ।
सोमबार पत्रकार सम्मेलन गर्दै मन्त्री खाणले यस्तो बताएका हुन् । उनले छोराछोरीले आमाको नामबाट नागरिकता लिँदा बाबुको पहिचान खुलाएपनि त्यसलाई सार्वजनिक नगरिने बताए ।
उनले भने, ‘आमाको नामबाट छोराछोरीले नागरिकता लिँदा बाबुको पहिचान खुलाउनुपर्ने भनिएको छ । तर स्वघोषणा सार्वजनिक हुँदैन । यो सरकारी अड्डामा मात्र हुन्छ । यो गोप्य दस्तावेजका रुपमा रहन्छ । आमाहरूको स्वाभिमानमाथि चोट नपुगेस् भन्नेमा सरकार गम्भीर छ ।’
मन्त्री खाणले आमाबाबु नभएका बालबच्चाको नागरिकता बनाउँदा संरक्षकहरुले नेपाली नागरिक हुन भनी स्थानीय जनप्रतिनिधिले प्रमाणित गुर्नपर्ने बताए ।
उनले स्थानीय तहका जनप्रतिनिधिको प्रमाणमा मात्र त्यस्ता बालबच्चालाई नागरिकता दिने व्यवस्था गरिएको बताए ।
