काठमाडौँ । नेकपा (माओवादी केन्द्र)को स्थायी कमिटी बैठक आज पनि बस्दैछ । बैठक बिहान ८ बजे पार्टी केन्द्रीय कार्यालय पेरिसडाँडामा बस्नेछ ।
बैठकमा आसन्न मंसिर ४ को संघीय र प्रदेशसभा निर्वाचनको तयारी, पदाधिकारी चयन, स्थायी कमिटीलाई पूर्णता दिनेबारे छलफल हुने भएको छ ।
साथै बैठकमा सत्ता गठबन्धनमा सिट बाँडफाँट देखिएको सकसका बारेमा पनि छलफल हुने भएको छ । माओवादी केन्द्रले निर्वाचनको लागि घोषणापत्र तयार गर्न नेपाल समाजवादी पार्टीका नेतासहितको एक समिति बनाउने तयारी गरिरहेको छ ।
यस विषयमा पनि आजको बैठकमा छलफल हुने बताइएको छ । माओवादी केन्द्रको चुनाव चिह्नबाट उम्मेदवारी दिने सहमति गरेका डा. बाबुराम भट्टराईले आफूलाई उम्मेदवार बनाउने वा नबनाउने जिम्मा प्रचण्डलाई नै छाडेका छन् ।
२०७२ असोजमा नयाँ संविधान जारी भएलगत्तै पुष्पकमल दाहाल प्रचण्डको नेतृत्वमाथि प्रश्न उठाउँदै माओवादी छाडेका भट्टराई एक फन्को मारेर उनकै नेतृत्व स्वीकार गर्न आइपुगेका छन् ।
माओवादी र भट्टराई नेतृत्वको नेपाल समाजवादी पार्टी (नेसपा) बीच मंगलबार एउटै चुनाव चिह्नबाट ४ मंसिरको प्रदेश र प्रतिनिधिसभा निर्वाचन लड्ने र चुनावपछि समाजवादी केन्द्र बनाउने औपचारिक सहमति भएको छ ।