![](https://onlinedabali.com/wp-content/uploads/2022/08/banchare-danda.jpg)
काठमाडौं । आज पनि बन्चरे डाँडामा तनाव उत्पन्न भएको छ । काठमाडौंबाट फोहोर बोकेर त्यहाँ पुगेका ट्रकहरुलाई स्थानीयले रोकेपछि तानाव सुरु भएको हो । आफूहरुका माग पूरा नगरेको भन्दै स्थानीयबासीले फोहोर विसर्जन गर्न नदिने बताउँदै थिए । तर काठमाडौंबाट फोहोर बोकेका ट्रकहरु बन्चरे पुगेका थिए ।
आफूहरुको स्वास्थ्यमा गम्भीर खेलवाड गरेको भन्दै स्थानीयले ट्रकलाई रोक्न खोज्दा प्रहरीले हस्तक्षेप गरेको छ । फोहोर विसर्जन गर्न नदिएपछि प्रहरीले रोक्न खोज्दा झडप भएको छ । प्रहरीले लाठी प्रहार गरेपछि स्थानीयले ढुंगामुढा गरेको बताइएको छ ।
प्रहरीले हवाई फायर गरेर स्थितिलाई नियन्त्रण लिन खोजेको छ । स्थिति नियन्त्रणमा लिन ५ राउण्ड हवाई फायर गरिएको प्रहरीले जनाएको छ । बञ्चरेडाँडामा प्रहरीले मकैबारी र धानखेतमा रहेको आन्दोलनकारीलाई लखेटेपछि डाँडामा रहेका स्थानीयले ढुंगा लडाएको बताइएको छ ।
केही समय फोहोर विसर्जनको काम राेकिएको थियो । फोहोर विसर्जन सहज बनाउन काठमाडौं र नुवाकाेट प्रहरी खटिएका छन् ।
प्रहरीले बल प्रयोग गर्न खोजेपछि स्थानीयले काठमाडौंका मेयर बालेन्द्र साहविरुद्ध नाराबाजी गरेका थिए । उनीहरुले चुनाव जितेपछि साहले पुगेको बेला सबै माग पूरा गर्ने भनेको तर अहिलेसम्म कुनै पहल नगरेको बताएका थिए ।