अनलाइन डबली
काठमाडौँ । आजबाट नेपाली सेनाले अमेरिकी सेनासँग एकमहिने संयुक्त सैन्य अभ्यास गर्ने भएको छ । नेपाली सेनाको जनसम्पर्क तथा सूचना निर्देशनालयका अनुसार आजबाट सुरु भएको सैन्य अभ्यास भदौ ३१ सम्म चल्नेछ । संयुक्त सैन्य अभ्यासमा नेपाली सेनाको श्री सिंह महावीर योजना तथा समन्वय महाशाखा अन्तर्गत रहेका रेञ्जर गणहरू र अमेरिकी सेनाको टुकडी सहभागी हुनेछन् ।
अभ्यासमा छाउनी र नगरकोट इलाकामा नेपाली सेनाबाट ८० जना तथा अमेरिकी सेनाका १६ जना गरी जम्मा ९६ जना सम्मिलित उक्त संयुक्त अभ्यासमा सहभागी हुने नेपाली सेनाले जनाएको छ ।
सोमबार विज्ञप्ति जारी गरेर नेपाली सेनाले सशस्त्र द्वन्द्व सम्बन्धी कानुन र सैन्य निर्णय प्रक्रिया (एमडीएमपी) लगायतका विषयमा सैन्य अभ्यास हुने जनाएको छ । संयुक्त सैन्य अभ्यसाको लागि अमेरिकी सेना क्याप्टेन ब्लेक डकाटेलको नेतृत्वमा अमेरिकी सेनाको टुकडी सोमबार नेपाल आइसकेको छ ।
नेपालमा कुनै खाले द्वन्द्व नभएको बेला जनयद्धको बेलामाझैं संयुक्त सैन्य अभ्यास हुन लागेको हो । जनयुद्धदेखि अमेरिकी सेनाले नेपाली सेनाले तालिम र अभ्यास गराउन सुरु गरेको थियो । सन् २०१५ देखि संयुक्त सैनिक अभ्यासका रुपमा ‘ब्यालेन्स नेल’ र ‘टेकनेल’ लाई अघि बढाएको थियो ।
नेपालले सन् २०११ देखि भारतसँग नेपाल–भारत ‘सूर्यकिरण’ संयुक्त सैनिक अभ्यास सुरुवात गरेको थियो । जुन एक वर्षमा एक पटक नेपाल र अर्को पटक भारतमा गरि दुई पटक हुँदै आइरहेको थियो । तर कोभिड–१९ को संक्रमणको कारण संयुक्त तालिम नियमित रूपमा भने हुन सकेको छैन ।
त्यस्तै नेपालले चीनको जनमुक्ति सेनासँग सन् २०१७ देखि नेपाल–चीन ‘सगरमाथा मैत्रीपूर्ण’ संयुक्त सैनिक अभ्यास सुरु गरेको थियो । यसैबीच चीनले सैन्य अभ्यासबारे चाँसो देखाएको बताइएको छ ।
