अनलाइन डबली
काठमाडौँ । नेकपा (माओवादी केन्द्र) को जारी बैठकमा अध्यक्ष प्रचण्डले पेश गरेको राजनीतिक प्रतिवेदन सर्वसम्मतिले पारित गरेको छ । बैठकमा सहभागी एक नेताका अनुसार केन्द्रीय समिति सदस्यहरुले उठाएका प्रश्न तथा धारणाबारे अध्यक्ष प्रचण्डले जवाफ दिएपछि राजनीतिक प्रतिवेदन सर्वसम्मतिले पारित भएको हो ।
अहिले बैठक जारी छ । अन्य एजेण्डामाथि छलफल भइरहेको छ । एक नेताका अनुसार पदाधिकारीसहितको सेट पेस गर्ने तयारी भइरहेको छ । प्रचण्डले अन्तिम सहमति नजुटेपछि विशेष महाधिवेशनबाट टुंगो लगाउने प्रस्ताव गर्ने छन् । आज पदाधिकारी नटुंगिएपनि स्थायी समिति र पोलिट्ब्यूरोको अध्यक्ष प्रचण्डले पेश गर्ने तयारीमा रहेको बताइएको छ ।
माओवादीले स्थानीय चुनावमा पार्टीमा अन्तरघात गर्नेलाई कारबाही गर्न छानबिन समिति बनाउने भएको निर्णय गरेको छ । पार्टी केन्द्रीय समितिको बैठकमा जवाफ दिँदै अध्यक्ष प्रचण्डले स्थानीय तह निर्वाचनमा अन्तर्घात गर्नेलाई कारबाही गर्न छानबिन समिति बनाइने जानकारी दिएका हुन् ।
अध्यक्ष प्रचण्डले संघीय निर्वाचनमा हुन सक्ने थप क्षतिलाई रोक्न १५ दिनमै प्रतिवेदन दिनेगरी छानबिन समिति बनाइने बताए । उनले दोषीमाथि विधानअनुसार निलम्बन र निष्काशनसम्मको कारबाही गरिने बताए । उनका अनुसार मधेसका धेरै र पहाडका केही स्थानमा अन्तर्घात देखिएकाले त्यसबारे छानबिन हुनुपर्ने बताए ।
त्यसैगरी अध्यक्ष प्रचण्ड आगामी प्रदेश र संघको चुनावमा उत्कृष्ट नतिजा ल्याउन प्रदेशमा समन्वय समिति बनाउने बताएका छन् । प्रचण्डले संघ र प्रदेशको चुनावमा उत्कृष्ट नतिजा ल्याउन सबै प्रदेशमा समन्वय समिति बनाइने जानकारी दिए ।
उनले समितिले नेता कार्यकर्तालाई फिल्डमा खटाउने बताए । अध्यक्ष प्रचण्डले नयाँ समिति बनाउँदा केही आत्तिन जरुरी नरहेको बताउँदै सबै कार्य विधान अनुरुप नै हुने बताए ।
