अनलाइन डबली
काठमाडौँ । अफगानिस्तानमा शक्तिशाली भूकम्प गएको छ । भूकम्पको केन्द्रबिन्दु दक्षिणपूर्वी अफगानिस्तानको खोस्त सहरभन्दा झन्डै ४४ किलोमिटर टाढा रहेको स्थानीय संचारमाध्यमहरुले बताएका छन् ।
भूकम्प मध्यरात गएकोले ठूलो मानवीय क्षति भएको हुन सक्ने बताइएको छ । प्रारम्भिक विवरणअनुसार ३०० जनाको ज्यान अधिकारीहरुले सरकारी संचार माध्यमहरुले बताएका छन् । स्ट्रेचर, भग्नावशेषहरू र भत्किएका घरहरूमा घाइते ओसारिएको दृश्य सामाजिक संजालमा देखिएका छन् ।
त्यसैगरी भूकम्पमा परी दुई हजार भन्दा बढी व्यक्तिहरु घाइते भएको बताइएको छ । यसको पुष्टि भने हुन सकेको छैन ।
घाइते र ज्यान गुमाउनेको संख्या अझै बढ्न सक्ने बताएको छ ।
सरकारका प्रवक्ता बिलाल करिमीका अनुसार भूकम्पका कारण सयौँ नागरिकको ज्यान जाननुका साथै दर्जनौँ घरहरू ध्वस्त भएका छन् ।
उक्त क्षेत्रमा थप विपद् आउन नदिनका लागि तत्काल उद्धार टोली पठाउन हामी दाताहरूलाई आग्रह गरको करिमीले बताएका छन् ।
भूकम्प केन्द्रबिन्दुभन्दा ५०० किलोमिटर टाढासम्म भूकम्पको तरङ्ग पुगेको बताइएको छ। अफगानिस्तानबाहेक पाकिस्तान र भारतसम्म पनि उक्त भूकम्पको धक्का महसुस भएको युरोपेली भूकम्प मापन केन्द्र ईएमएससीले जनाएको समाचारसंस्था रोएटर्सले उल्लेख गरेको छ।प्रत्यक्षदर्शीहरूले जनाएअनुसार अफगान राजधानी काबुल र पाकिस्तानको राजधानी इस्लामाबादमा पनि भूकम्पको धक्का पुगेको थियो।
अफगानिस्तान भूकम्पीय हिसाबले जोखिम मानिन्छ । संयुक्त राष्ट्रसङ्घका प्रतिवेदन अनुसार प्रत्येक वर्ष अफगानिस्तानमा भूकम्पका कारण सरदर ५६० जनाको मृत्यु हुने गरेको छ । ग्रामीण भेगमा बलियो घर नबनाइने भएकाले विशेष गरेर त्यहाँ भूकम्पले ठूलो मानवीय क्षति पुर्याउने गरेको छ।
