काठमाडौं । आज प्रदेश सरकारले बजेट सार्वजनिक गर्दैछन् । आर्थिक वर्ष २०७९/८० को लागि बजेट सातवटै एकैसाथ सार्वजनिक गर्ने गर्दैछन् । अन्तरसरकारी वित्त व्यवस्थापन ऐन–२०७४ मा व्यवस्था भएअनुसार असर १ गते प्रदेश सरकारले बजेट ल्याउनु पर्ने हुन्छ ।
साेही व्यस्थाअनुसार सबै प्रदेशले आज बजेट सार्वजनिक गर्न लागेका हुन् । बजेटमा कृषि र पर्यटनलाई मुख्य प्राथमिकता राखेको बताइएको छ । संघीय बजेटअनुसार सबै प्रदेशले कृषिलाई प्राथमिकतामा राखेका छन् । सबै प्रदेशले अघिल्लो सरकारले अगाडि सारेका योजनालाई निरन्तरता दिने र केही वितरणमुखी बनाइएको छ ।
कुनै प्रदेशले बजेट आकार बढाएका छन् भने केही पुरानै आकारलाई केन्द्र मान्दै बजेट तयार गरेका छन् । वाग्मती प्रदेश सरकारले सङ्घीय र प्रादेशिक चुनावलाई लक्षित गरी ठूलो आकारको बजेट ल्याउँदैछ । चालु आर्थिक वर्षका लागि ५७ अर्ब ७२ करोड रुपैयाँ बराबरको बजेट ल्याएको वाग्मती सरकारले बढाएर बजेट ल्याउँदैछ ।
त्यसैगरी प्रदेश-१ सरकारले झन्डै ३८ अर्ब रुपैयाँ बराबरको बजेट ल्याउने तयारी गरेको छ । प्रदेश-१ को नीति तथा कार्यक्रममा कृषि क्षेत्र मुख्य प्राथमिकतामा रहेको थियो । मधेस प्रदेश सरकारले चालु आर्थिक वर्षकै हाराहारी झन्डै ३४ अर्बको बजेट ल्याउँदैछ ।
गण्डकी प्रदेश सरकारले पनि चुनाव केन्द्रित बजेट ल्याउने तयारी गरेको छ । दिउँसाे ४ बजे बस्ने प्रदेश सभा बैठकमा गण्डकी प्रदेशका अर्थमन्त्री रामजीप्रसाद बरालले बजेट प्रस्तुत गर्नुहुनेछ । गण्डकी प्रदेश सरकारले जेठ २४ गते नीति तथा कार्यक्रम ल्याएको थियो । चालु आर्थिक वर्षका लागि ३० अर्ब ९० करोडको बजेट ल्याएको गण्डकीले झन्डै ६ अर्ब बढाउने तयारी गरेको छ । अहिलेको भन्दा केही बढी बजेट आउने अर्थमन्त्री बरालले जानकारी दिनुभयो ।
लुम्बिनी प्रदेश सरकारले पनि आउँदो वर्षको बजेटको आकार बढाउने तयारी गरेको छ । लुम्बिनी प्रदेशमा चालु आर्थिक वर्षको बजेट ४१ अर्बको रहेको थियो ।
कर्णाली प्रदेश सरकारले चालु आर्थिक वर्षकै हाराहारीमा बजेट सार्वजनिक गर्दैछ । चालु आर्थिक वर्षमा कर्णाली प्रदेश सरकारले ३६ अर्ब ५४ करोड बराबरको बजेट ल्याएको थियो । कर्णाली प्रदेश सरकारले नीति तथा कार्यक्रममा शिक्षा, स्वास्थ्य र पूर्वाधार निर्माणमा जोड दिएको छ ।
सुदूरपश्चिम प्रदेशमा चालु आर्थिक वर्षको भन्दा केही बजेट बढाएर ल्याउने तयारी छ । आउँदो आर्थिक वर्षका लागि ३४ अर्ब रुपैयाँ बराबरको बजेट ल्याउने तयारी छ । चालु आर्थिक वर्षमा सुदूरपश्चिम प्रदेशले ३० अर्ब ३३ करोडको बजेट ल्याएको थियो।