काठमाडौं । काठमाडौं महानगरपालिकाको जारी मतगणनामा स्वतन्त्र उम्मेदवार बालेन साहले अग्रतालाई कायम राखेका छन् । उनले ११४३४ मत पाएका छन् भने उनका निकटतम प्रतिद्वन्द्वी एमालेका केशव स्थापितले ६२५८ मत पाएका छन् ।
स्थापित र साह बीचको मतान्तर ५१७६ देखिएको छ । यस्तै मेयरका अर्का उम्मेदवार सिर्जना सिंहले ५४०८ मत पाएकी छन् । यस्तै भरतपुर महानगरपालिकाको मेयरमा नेकपा माओवादी केन्द्रकी उम्मेदवार रेनु दाहालले १०९ मतको अग्रता लिएकी छन् ।
१८ हजार ६८३ मत गणना गरिसक्दा गठबन्धनबाट मेयरको उम्मेदवार बनेकी रेनु दाहालले ६ हजार २४९ मत पाएकी छन् । नेकपा एमालेका विजय सुवेदीले ६ हजार १४० मत पाएका छन् ।
स्वतन्त्र उम्मेदवार जगन्नाथ पौडेलले ३ हजार ३८ मत प्राप्त गरेका छन् । उप मेयरतर्फ नेपाली काँग्रेसका चित्रसेन अधिकारीले ७ हजार ६११ मत पाएर अग्रता कायम राखेका छन् ।
राप्रपाकी हिमला गुरुङले ५ हजार ३२ मत प्राप्त गरेकी छन् । अहिले भरतपुर महानगरको वडा नम्बर ५ को मतगणना जारी छ । त्यस्तै कञ्चनपुरको भिमदत्त नगरपालिकामा नेपाली काँग्रेसबाट मेयरका उम्मेदवार पदम बोगटीले फराकिलो अग्रता लिएका छन् ।
बोगटीले १०१२ मतका साथ फराकिलो अग्रता लिइरहँदा नेकपा एकीकृत समाजवादीका राजेन्द्र पाण्डेले ३५८ मत प्राप्त गरेका छन् भने एमालेका महेश पन्तले ३१९ मत प्राप्त गरेका छन् ।
त्यस्तै राप्रपाका गजेन्द्र चन्दले २६३ मत प्राप्त गरेका छन् । नगरपालिका उपप्रमुखमा पनि काँग्रेसका उम्मेदवार निलम लेखक जोशीले ८६३ मतसहित अग्रता लिइरहेकी छन् ।
उनलाई माओवादी केन्द्रका बोक्सर जोशीले ६०८ मतसहित पछ्याइरहेका छन् भने एमालेका भुवन कुँवरले ४३५ मत प्राप्त गरेका छन् । राप्रपाका हेलेन श्रेष्ठले २१७ मत प्राप्त गरेका छन् ।
जाजरकोटको शिवालय गाउँपालिकामा सत्ता गठबन्धनबाट नेपाली कांग्रेसका अध्यक्षका उम्मेदावर शेरबहादुर शाही र उपाध्यक्षमा नेकपा (माओवादी केन्द्र) का गीताकुमारी शाही निर्वाचित भएका छन् ।
मतगणनाको अन्तिम परिणामअनुसार शाहीले तीन हजार ३०३ मत ल्याउँदा नेकपा एमालेका रंगनाथ योगीले दुई हजार ७१८ मत ल्याएका छन् । उनीहरूबीच ५८५ को मतान्तर रहेको शिवालय निर्वाचन अधिकृतको कार्यालयले जनाएको छ ।
त्यसैगरी उपप्रमुखमा सत्ता गठबन्धन दलका तर्फबाट नेकपा माओवादी केन्द्रका गीता शाहीले एमालेकी नैनसरा शाहीलाई २४० मतको फराकिलो अन्तरले उछिनेकी छन् । माओवादी केन्द्रका शाहीले दुई हजार ६५९ मत ल्याउँदा एमालेकी नैनसरा शाहीले दुई हजार ४२९ मत मात्रै प्राप्त गरेकी हुन् ।