काठमाडौँ । काठमाडौं महानगरपालिकाको मतगणना सुरु हुन अझै केही समय लाग्ने देखिएको छ ।
मतपेटिका संकलनको काम भइरहेको र सर्वदलीय बैठक नै नबसेका कारण तत्कालै मतगणना सुरु हुने अवस्था नरहेको जिल्ला निर्वाचन कार्यालय काठमाडौंका प्रमुख ठाकुरप्रसाद भट्टराईले बताए ।
‘हामी बाकस बुझ्ने क्रममै छौं, सर्वदलीय बैठक पनि बसेको छैन’ उनले भने, ‘ सर्वदलीय बैठकले जतिबेला देखि गणना सुरु हुन्छ भनेर निर्णय गर्छ, त्यतिबेलैदेखि मतगणना सुरु हुन्छ ।’
५०/६० वटा मतपेटिका बुझ्न बाँकी रहेको र ती मतपेटिका बुझेपछि सर्वदलीय बैठक बस्ने मुख्य निर्वाचन अधिकृतको कार्यालयले जनाएको छ । त्यसपछि सर्वदलीय बैठकमा भएको सहमति अनुसार मतगणना सुरु गर्ने जिल्ला निर्वचन अधिकारी भट्टराईले बताए ।
यसैबीच देशका विभिन्न जिल्लाका पालिकाअन्तर्गतका ७७ मतदान केन्द्रमा पुन चुनाव हुने भएको छ । विभिन्न राजनीतिक दलका कार्यकर्ताहरुबीचको झडपका कारण मतदान स्थगित भएको हो।
आयोगको संयुक्त निर्वाचन सञ्चालन केन्द्रका अनुसार शुक्रबार राति १० बजेसम्म राजनीतिक दल तथा उम्मेदवारबीच विभिन्न कारणले उत्पन्न विवादपछि १६ जिल्लाका २८ पालिकाका ४३ मतदानस्थलका ७७ मतदान केन्द्रमा मतदान स्थगित भएको हो ।
उक्त स्थानहरूमा आयोगले अन्यथा निर्देशन दिएमा बाहेक निर्वाचन अधिकृतले मतदान केन्द्रमा पुनः मतदान हुने मिति र समय यथाशीघ्र तोक्नेछन् । मतदान अधिकृतले स्थानीय स्तरमा छलफल चलाएर नयाँ मिति छिट्टै तोक्ने बताइएको छ ।
सहमति जुटेपछि अधिकृतले सूचना प्रकाशन गरी पुनः मतदान गराउने आयोगका प्रवक्ता शालिग्राम शर्मा पौडेलले जानकारी दिए । शुक्रबार भएको निर्वाचनअन्तर्गत लुम्बिनी र गण्डकी प्रदेशका कुनैपनि मतदान केन्द्रमा मतदान स्थगित भएको छैन ।
