अनलाइन डबली
सुर्खेत । चुनाव आउन २४ दिन मात्रै बाँकी रहँदा नेकपा (एमाले)लाई कर्णाली प्रदेशमा ठूलो धक्का लागेको छ । प्रदेशको डोल्पामा एमालेबाट निर्वाचित दुईवटा गाउँपालिका अध्यक्ष एकीकृत समाजवादीमा प्रवेश गरेका छन् । यो एमालेको लागि ठूलो धक्का भएको बताइएको छ ।
२०७४ को स्थानीय निर्वाचनमा एमालेबाट राम्रो मत ल्याएर जितेका काईके गाउँपालिका अध्यक्ष अंगत रानाले एमाले छोडेका छन् । त्यस्तै, गुरुङले एमालेको सहयोगमा स्वतन्त्रबाट जितेका छार्काताङ्सोङ गाउँपालिका अध्यक्ष सेनाङ गुरुङले एमाले छोडेका हुन् । सोमबार साँझ एक विज्ञप्ति जारी गर्दै राना र गुरुङले आफूहरु एकीकृत समाजवादीमा प्रवेश गरेको घोषणा गरेका छन् ।
दुबै जनाले एमालेलाई प्रतिगामी शक्ति भएको बताउँदै संविधान, लोकतन्त्र, गणतन्त्र संस्थागत गर्न माधव नेपालले सही कदम चालेको विज्ञप्तिमा उल्लेख गरेका छन् ।
विज्ञप्तिमा आगामी स्थानीय निर्वाचनमा एकीकृत समाजवादीलाई भोट हाल्न समेत मतदातालाई आग्रह गरेका छन् । राना र गुरुङको बहिर्गमनसँगै डोल्पामा एमाले कमजोर भएको छ ।
