हुम्ला । संघीय लोकलतान्त्रिक गणतन्त्र नेपालको प्रथम कार्यकालको समय सकिँनै लाग्दा देश दोस्रो चुनावको तयारीमा होमिएको छ । यसै बेला ७५३ स्थानियक निकायको लागि निर्वाचन आयोगको आचारसंहिता सार्वजनिक भएसँगै राजनीतिक दलहरुले उम्मेदवार गृहकार्यमा जुटिरहेका छन् । उम्मेदवारमा वर्तमान जनप्रतिनिधिसहित राजनीतिक दलका नेताहरुले आकांक्षा देखाइरहेका छन् ।
हुम्लाको सर्केगाड गाउँपालिकामा पनि राजनीतिक दलहरु उम्मेदवार छनोटको गृहकार्य गरिरहेका छन् । यसअघि २०७४ सालमा नेकपा (माओवादी केन्द्र) र नेकपा एमालेको गठबन्धनले निर्वाचन जितेको थियो । माओवादीको तर्फबाट युवा नेता कृष्ण रोकाया अध्यक्ष र नेकपा (एमाले) को तर्फबाट नेता जोशी धामीले उपाध्यक्षमा जितेका थिए ।
विभिन्न राजनीतिक दलले गाउँ केन्द्रित कार्यक्रमहरु घनिभूतरुपमा अगाडि बढाईरहेको बेला सर्केगाडमा चुनावी रस्साकसी अझ बढेको छ । अहिले सो गाउँपालिकामा पाँच दलीय गठबन्धन नै संयुक्तरुपमा लड्ने केन्द्रको निर्णय कायान्वयन गर्ने सम्भावनासँगै सो गाउँपालिका अझ तातेको पाईन्छ ।
माओवादीको तर्फबाट जनयुद्धमा केन्द्रीय जनकलाकारकारुपमा चर्चा कमाएकी देवकी तिमल्सिना‘समिक्षा’, गाउँकमिटी अध्यक्ष चन्द्र सिं कार्की ‘मुक्ति’, अकिल बुढा, छवि थापा, जसकला ऐडी, कालीबहादुर विक र वर्तमान गाउँपालिका अध्यक्ष कृष्ण रोकाया ‘करुण’ अध्यक्ष पदका आकांक्षी रहेका छन् । अाकांक्षीकाे संख्या बढेकाेले उम्मेदवारी चयनमा माओवादीलाइ सकस पर्ने देखिएकाे छ ।
