काठमाडौं । सत्ता गठबन्धन पाँच दलले संयुक्त अपील जारी गर्ने अन्तिम तयारीमा जुटेका छन् । स्थानीय तह निर्वाचन र समसामयिक विषय समेटेर संयुक्त अपिल जारी गर्ने बताइएको छ ।
स्थानीय तह निर्वाचन प्रयोजनका लागि पाँच दलीय गठबन्धनको तयारी र अनुगमन संयन्त्रको आइतबार बसेको बैठकले संयुक्त अपील जारी गर्ने निर्णय गरेको हो । बैठकले निर्वाचनमा पाँच दलीय गठबन्धनका बीचमा मात्र तालमेल गरी गठबन्धनको भावना र आपसी सम्मान कायम गर्दै सहकार्य गरी अगाडी बढ्ने शीर्ष नेता समक्ष प्रस्ताव गर्ने पनि निर्णय गरेको छ ।
यस्तै बैठकले प्रदेश र जिल्लाले २०७८ चैत्र मसान्त भित्र पाँच दलीय बैठक राखी सहमति कायम गरेर केन्द्रमा निर्णय पठाउनुपर्ने पनि बैठकपछि जारी विज्ञप्तिमा उल्लेख छ ।
सत्ता गठबन्धन दलहरुले जिल्ला जिल्लामा पनि गठबन्धन गर्ने निर्णय गरिरहेका छन् । तर धेरै जिल्लाहरुले अझै निर्णय गरिसकेका छैनन् । जिल्लाले निर्णय गरेका ठाउँमा पनि सम्बन्धित पालिका स्तरिय नेताहरुले आफू अनुकुल हेरेका कारण गठबन्धनमा केही समस्या पनि देखिएका छन् ।
संयुक्त अपील र स्थानीय तह निर्वाचन तयारी तथा अनुगमन समितिका सदस्य केशवराज जोशीका अनुसार गठबन्धन पाँच दलको बैठक बस्दैछ । प्रधानमन्त्री निवास बालुवाटारमा बस्ने बैंठकले कांग्रेस नेता रामचन्द्र पौडेलको नेतृत्वमा गठन भएको समितिको आइतबार बसेको बैठकले गरेका निर्णयमाथि छलफल गरी तालमेलको टुंगो लगाउने बताइएको छ ।
स्थानीय तह निर्वाचनमा तालमेल गर्ने निर्णय गरेको सत्ता गठबन्धनले भागबण्डाको भने टुंगो लगाइसकेको छैन ।
