सुर्खेत । नेकपा (माओवादी केन्द्र) का कर्णाली प्रदेशका नेता ठम्बर बहादुर विष्ट नेकपा एमालेमा प्रवेश गरेका छन् । प्रदेश सभा संसदीय दलका प्रमुख सचेतक समेत रहेका विष्टले सांसद पदबाट राजिनामा दिएका थिए ।
माओवादी केन्द्रको कर्णाली प्रदेशले राजिनामा फिर्ता लिन निर्देशन दिएको थियो तर विष्टले फिर्ता लिएनन् । माओवादी केन्द्र कर्णाली प्रदेश दलको सदस्यबाट निलम्बन गरेको थियो ।
माओवादीले निलम्बन गरेपछि विष्टले आइतबार एक कार्यक्रमबीच एमालेमा प्रवेश गरेका छन् । आइतबार वीरेन्द्रनगरमा रहेको सिटी हलमा आयोजना गरिएको बृहत् कार्यकर्ता भेला तथा पार्टी प्रवेश कार्यक्रममा विष्टले एमाले प्रवेश गरेका हुन् । उनलाई एमालेका वरिष्ठ उपाध्यक्ष ईश्वर पोखरेलले अबिर लगाएर स्वागत गरेका थिए ।
विष्टले माओवादीले एमसीसी पास गरेको, वरिपरी घुम्नेहरुले मात्रै फाइदा लिएको र माओवादीले धाेका दिएको भन्दै २७ गते पार्टी परित्याग गरेको घोषणा गरेका थिए ।
माओवादीका नेताहरुले ठम्बर विष्ट तत्कालिन (नेकपा) कै बेला पनि ओली समूहमा गएको बताएका छन् । (नेकपा) विभाजनपछि मन्त्री बनाउने आश्वासनपछि माओवादीमै रहेका विष्ट त्यसपछि संदीय दलको प्रमुख सचेतक बनाएका थिए ।
माओवादीले विष्ट अबसरवादी नेता भएको भन्दै आमाको दूधले नपुगेको ‘बा’ को घुँडा चुस्न गएको बताएका छन् । कर्णाली प्रदेशका एक नेताले विष्ट अहिले मन्त्री नपाएरै एमालेमा प्रवेश गरेकाे बताए ।