काठमाडौँ । विप्लव नेतृत्वको नेपाल कम्युनिस्ट पार्टीको केन्द्रीय समितिको बैठक आजबाट बस्दैछ । बिहान ८ बजे कपिलवस्तु शिवगढीमा बस्न लागेको बैठकको सबै तयारी पूरा भएको जनाइएको छ ।
बैठकमा सहभागी हुन केन्द्रीय सदस्यहरु सबै सम्पर्कमा पुगिसकेको बताइएको छ । बैठकमा केन्द्रीय समिति बैठकमा पार्टीको पछिल्लो अवस्था, एमसीसी, स्थानीय निकायको निर्वाचनबारे छलफल गरी आगामी कार्यक्रम तय गर्ने बताइएको छ ।
एक नेताका अनुसार आजको बैठकमा महासचिव विप्लवले राजनीति प्रतिवेदन पेश गर्नेछन् । प्रस्तावमा राष्ट्रिय राजनीतिको समिक्षा गर्दै स्थानीय तहको चुनावमा सहभागी हुने प्रस्ताव गरिएको बताइएको छ ।
यसअघि विप्लवले सचिवालय बैठकमा चुनावमा सहभागी हुने प्रस्ताव राखिसकेका छन् । तर सर्वसम्मत हुन नसकेपछि केन्द्रीय समितिमा छलफल गरेर टुंगो लगाउने बताइएको थियो ।
सचिवालयमा चुनाव उपयोगको विपक्षमा धर्मेन्द्र बास्तोला, हेमन्तप्रकाश ओली र सन्तोष बुढाले धारणा राखेका थिए भने उपयोग गर्ने महासचिवको प्रस्तावको पक्षमा प्रबक्ता खड्कबहादुर विश्वकर्मले धारणा राखेका थिए ।
प्रधानमन्त्री कार्यालय स्रोतका अनुसार नेकपाले चुनावमा सहभागी हुने जानकारी दुई दिन पहिले प्रबक्ता बिकले गराएका थिए । चुनावमा सहभागी हुने निर्णय गरे निर्वाचन सम्बन्धी आवश्यक निर्णय गर्न सरकार तयार रहेको प्रधानमन्त्री शेरबहादुर देउवाले आवश्वासन दिएका थिए ।