काठमाडौँ । नेकपा एमालेका अध्यक्ष केपी शर्मा ओलीले अमेरिकाको षड्यन्त्रमा आफ्नो नेतृत्वका सरकार ढालिएको बताएका छन् । उनले आफ्नो सरकार ढाल्न अमेरिकाबाटै इमेल आएको समेत दाबी गरे ।
शुक्रबार पोखरामा सुरु भएको प्रेस चौतारीको नवौं राष्ट्रिय सम्मेलनमा बोल्दै ओलीले भने, “अमेरिकाबाटै इमेल आउँछ, केपी ओलीको सरकार ढाल्नु नै थियो । न्यायाधीशको के बिगारिदिएको थियो त्यो सरकारले ? होइन त्यहाँनेर वर्गी पूर्वाग्रह, दुराग्रह र विकास विरोधी षड्यन्त्र भएको थियो भन्ने कुरा त्यस इमेलले बताउँछ ।”
संविधान बाहिर गएर जननिर्वाचित सरकार अमेरिकी षड्यन्त्रकै कारण ढालेको भन्दै सर्वोच्च अदालतमा गोरु ब्याएको बताए । “संविधान बाहिर गएर हामीले यत्रो ठूलो उपलब्धी हासिल गरेका छौं कि एउटा जननिर्वाचित सरकार ढालेका छौं । नभएको अधिकार प्रयोग भएको छ अदालतबाट । तर नेपालमा एकपल्ट एक जनाले भनेका थिए–गोरु ब्याउँदैन भन्थे नेपालको सर्वोच्च अदालतमा ब्यायो । उनले उहिल्यै ०५२ सालमा भनेका थिए । अहिले गोरु ब्याएन मात्रै होइन ५ वटा बाच्छा पायो” ओलीले भने ।
ओलीले संविधान बाहिर गएर प्रगतिशील सरकारलाई सर्वोच्चले ढाल्ने काम गरेको आरोप लगाए । उनले आफूहरुले परमादेशको समर्थन गर्न नसक्ने पनि बताए । जनादेशको माखौल र जनतामा रहेको सार्वभौमसत्ताको मजाक उडाएको बताए ।
