काठमाडौँ । विवादित एमसीसीलाई लिएर पाँच दलीय सत्ता गठबन्धन टुट्ने भएको छ । नेकपा (माओवादी केन्द्र) एमसीसी कुनै पनि हालतमा पास गर्न तयार नभएपछि काँग्रेसले गठबन्धन तोड्ने निष्कर्षमा पुगेको हो ।
संसद भवनमै काँग्रेस र नेपाल एमालेका शिर्ष नेता र प्रधानमन्त्री शेरबहादुर देउवा र एमाले अध्यक्ष केपी शर्मा ओलीबीच भएको वान टु वान बार्तापछि काँग्रेस नेताहरुले गठबन्धन टुटेको सार्वजनिक रुपमै बताएका छन् । काँग्रेस महामन्त्री गगन थापाले
गठबन्धन धरापमा परेको बताए । उनले अब सत्ता गठबन्धन अगाडि बढ्न नसक्ने बताए । थापाले गठबन्धनबाट एमसिसी पार नलाग्ने भएपछि आफूहरुले गठबन्धनको विकल्प खोजेको बताए ।
एमालेले राखेका मागमा काँगू्रेस तयार भएको बताइएको छ । देउवा र ओलीबीच साँझ फेरि बैठक बसेर ठोस गर्ने नेताहरुले बताएका छन् ।
देउवा र ओलीबीचको छलफलपछि अहिले माओवादी केन्द्रका अध्यक्ष प्रचण्डसहितका नेताहरुबीच छलफल भइरहेको छ । प्रचण्डसहितका नेताहरु ओलीको कार्यकक्षमै पुगेका थिए । एमसीसीबारे एमालेले अहिले औपचारिक निर्णय गरिसकेको छैन ।
आजको छलफलले एमालेले आजै एमसीसीबारे औपचारिक धारणा सार्वजनिक गर्ने भएको छ । एमसीसीकै कारण सत्तादेखि सडकसम्म विभाजन छ । एमालेसँग भएको सहमति अनुसार काँग्रेस नेताहरुले सभामुखलाई भेटेका छन् । एमालेले सभामुखले राजिनामा दिनुपर्ने नभए महाअभियोग लगाएर हटाउनु पर्ने माग राख्दै आएको छ । त्यसमा काँग्रेस सहमत भएकोले एमाले एमसीसीमा सघाउन तयार भएको बताइएको छ ।
माओवादी नेताहरुले बरु गठबन्धन तोड्न तयार तर एमसीसीको पक्षमा मतदान नगर्ने बताइरहेका छन् भने काँग्रेस नेताहरु एमसीसीलाई पास नगर्ने भए सँगै बस्न सकिँदैन । ओलीको संसद विघटन गर्ने कदमविरुद्ध एक ठाउँमा उभिएका पाँच दल अब अगाडि बढ्न नसक्ने अवस्थामा पुगेको बताइएको छ ।
दिनभरएमसीसीको विरोधमा बानेश्वरमा प्रदर्शन भएको थियो । प्रहरीले गो ली प्रहार गर्दा एक जनाको अवस्था गम्भीर भएको छ । उनको टाउकोमा गो ली लागेको छ । वानेश्वरस्थित एभरेष्ट अस्पतालमा उपचार हुन नसकेपछि ट्रामा सेन्टरमा रिफर गरिएको छ ।
माओवादी केन्द्र निकट अखिल क्रान्तिकारी, वाइसिएलका कार्यकर्ताले विरोध प्रदर्शन गरिररहेका थिए । त्यस्तै विप्लव नेतृत्वको नेकपासहित ६ पार्टी २ मोर्चाको संयुक्त विरोध प्रदर्शन पनि दिनभर जारी रह्यो । प्रहरीले दुई दर्जनभन्दा बढीलाई नियन्त्रणमा लिएको छ ।