काठमाडौं । नेकपा (एमाले)का अध्यक्ष केपी शर्मा ओली प्रधानमन्त्री शेरबहादुर देउवालाई भेट्न बालुवाटार छिरेका छन् । यो गठबन्धन रहेसम्म बालुवाटार नछिर्ने बताउँदै आएका ओली मंगलबार साँझ बालुवाटार छिरेका हुन् ।
बालुवाटार स्रोतका अनुसार अहिले देउवा र ओलीबीच छलफल चलिरहेको छ । छलफलको मुख्य विषय विवादित अमेरिकी मिलेनियम च्यालेन्ज कर्पोरेशन (एमसीसी) र सत्ता गठबन्धन रहेको बताइएको छ ।
सत्तारुढ पार्टीकै असहमतिमै सरकारले एमसीसी संसदमा टेबल गरेको छ । सत्ता साझेदार नेकपा (माओवादी केन्द्र) र नेकपा एकीकृत समाजवादीले विपक्षमा मतदान गर्ने निर्णय गरेपछि देउवाले ओलीसँगको संवाद बढाएका हुन् ।
ओलीले सरकारलाई सहयोग नगर्ने बताएपनि आफैले संसदमा दर्ता गराएको एमसीसीको विपक्षमा नजान उनी दवावमा छन् । एमालेले संसद अबरुद्ध गरिरहेकै बेला केही नेताहरुले एमसीसीको पक्षमा बोल्न थालेपछि ओली दवावमा परेका छन् । एमसीसीबारे एमालेले धारणा बनाउन सकेको छैन । ओलीले प्रचण्ड र माधव कुमार नेपालले साथ दिएसम्म आफूले सरकारलाई एमसीसीमा सहयोग गर्न नसकिने बताउँदै आएका थिए । तर, आज छलफल गर्न बालुवाटार छिरेका छन् ।
काँग्रेस र माओवादी नेताहरुले एमसीसीबारे आआफ्नो धारणा राख्न पाउने गरी एमसीसी संसदमा टेबल गर्न सहमति जुटाएका थिए । माओवादी केन्द्रले संसदमा बोल्दै आफ्नो सहमति नभएको बताउँदै विपक्षमा मतदान गर्ने बताइस्केको छ ।