काठमाडौं । प्रधानमन्त्री शेरबहादुर देउवाले अमेरिकाको विवादित परियोजना मिलेनियम च्यालेन्ज कर्पोरेशन (एमसीसी) संसदबाट फेल हुन सक्ने बताएका छन् । देउवाले विहीबार काठमाडौँमा आयोजित एक कार्यक्रममा बोल्दै आफू एमसीसीलाई संसदबा पारित गराउन लागेको तर पास वा फेल जे पनि हुनसक्ने बताएका हुन् ।
“एमसीसी पास गराउन हामीले एक मतले निर्णय गरेका हौं । त्यसमा लागिराखेको छु । फेल पनि हुनसक्छ” देउवाले भने । उनले एमसीसी राष्ट्रको हितमा भएको दाबी गर्दै एमसीसीको पक्षमा बोल्न काँग्रेसले डराउन नहुने समेत बताए ।
सोही कार्यक्रममा बोल्दै नेपाली कांग्रेसका महामन्त्री गगनकुमार थापाले एमसीसी राष्ट्रहितमा भएको दाबी गर्दै काँग्रेसले खुट्टा कमाउन नहुने बताए । उनले कांग्रेसले आफ्नो भूमिका निर्बाह गर्नुपर्ने बताए । काँग्रेसले सरकारमा बस्दा एउटा र प्रतिपक्षमा बस्दा अर्को धारणा बनाउने नगरेको बताए ।
तर, सामाजिक संजालमा थापाले प्रतिपक्षमा हुँदा एमसीसी संशोधन बिना संसदबाट पास गर्न नहुने भन्दै बोलेको कुरा भाइरल भएको छ । उक्त अन्तरवार्तामा थापाले यथास्थितिमा एमसीसी पास गर्न नसकिने बताएका छन् । त्यतिबेला संशोधन विना पास गर्नु देशहितमा नभएको बताएका थापाले अहिले कहिलै दोहोरो कुरा नगरेको दाबी गरिरहेका छन् ।
