काठमाडौं । विवादित अमेरिकी मिलेनियम च्यालेन्ज कर्पोरेशन (एमसीसी) आज संसदमा पेश नहुने भएको छ । नेकपा माओवादी केन्द्रका अध्यक्ष प्रचण्डले नमानेपछि आज बस्ने प्रतिनिधि सभा बैठकमा एमसीसी टेबुल नहुने भएको हो ।
जबरजस्त संसदमा पेश गरे आफू त्यसको विरुद्धमा उभिने र सरकारबाटै बाहिरिने प्रचण्डको चेतावनीपछि प्रधानमन्त्री शेरबहादुर देउवाल आज बस्ने बैठकमा एमसीसी पेश नगर्ने निर्णयमा पुगेका छ्न । सरकारले आज संसदमा पेश गर्ने निर्णय गरेपछि प्रचण्ड देउवालाई भेटेरै आफ्नो कुरा सुनाएका थिए ।
बालुवाटार भएको देउवा र प्रचण्डको भेटवार्ता पछि एमसीसी संसदमा पेश नगर्ने सहमति भएको छ । त्यस्तै, भोलि सत्ता गठबन्धन दलको बैठक बस्ने र थप निर्णय गर्ने सहमति भएको प्रधानमन्त्रीका प्रेस संयोजक गोविन्द परियारले संचारकर्मीलाई जानकारी दिएका छन् ।
माओवादी केन्द्रका संसदीय दलको बैठकले प्रचण्डकै प्रस्तावामा एमसीसीको विपक्षमा उभिने निर्णय गरेको थियो ।
संसदीय दलको निर्णयसहित प्रचण्ड प्रधानमन्त्री निवास पुगेका थिए । माओवादी केन्द्रले जबरजस्त एमसीसी आजै पेश गरे आफू सरकारबाटै बाहिरिने चेतावनी समेत दिएको थियो ।
यसैबीच सभामुख अग्नि सापकोटाले आजको प्रतिनिधिसभा बैठकको कार्यसूचीमा एमसीसी नराखिने जानकारी दिएका छन् । प्रधानमन्त्री देउवाले सभामुखलाई हिजो फोन गरेर कार्यसूचीमा राख्न भनेका थिए । तर, प्रचण्ड र देउवाको सहमतिपछि कार्यसूचीमा नराख्न सरकारले सभामुखलाई आग्रह गरेको थियो ।
