काठमाडौं । निर्वाचन आयोगले आगामी ४ जेठ स्थानीय तहको निर्वाचन गर्न सिफारिस गरेको छ । आयोगले जेठ ५ गते कार्यकाल पूरा हुन लागेकोले २०७९ को जेठ ४ गते निर्वाचन गर्न सरकारलाई सिफारिस गरेको हो ।
मंगलबार प्रधानमन्त्री निवास बालुवाटारमा भएको भेटमा आयोगका पदाधिकारीहरुले सो सिफारिस गरेका हुन् । कार्यकाल सकिनु अगावै निर्वाचन गर्नु आफ्नो संवैधानिक दायित्व भएको बताउँदै आयोगका पदाधिकारीहरुले प्रधानमन्त्री शेरबहादुर देउवासँगको भेटमा भनेका थिए ।
आयोगले सिफारिस गरेको मितिमा चुनाव गर्न आफू सकारात्मक रहेको जानकारी गराउँदै प्रधानमन्त्री देउवाले राष्ट्रिय समिति जुटाएर अगाडि बढ्ने बताएका थिए । प्रधानमन्त्री देउवाले सत्ता गठबन्धन दलको बैठकमा सो प्रस्ताव लैजाने र त्यसबाट अनुमोदन गराएर औपचारिक रुपमा मिति सार्वजनिक गर्ने तयारी गरेको बताइएको छ ।
आयोगले यसअघि एकै चरणमा गर्ने भए १४ वैशाख र दुई चरणमा गर्ने भए १४ र २२ वैशाखमा गर्न प्रस्ताव गरेको थियो । तर सत्तारुढ पाँचदलीय गठबन्धनले संविधानसँग स्थानीय तह निर्वाचन ऐन बाझिएको भन्दै ऐन संशोधन गर्नुपर्ने बताएको थियो ।
गठबन्धन दलका शिर्ष नेताहरुले तीनवटै तहको निर्वाचन एकैपटक गर्ने बताएका थिए । स्थानीय तहको चुनाव सारेर जनप्रतिनिधिविहीन बनाउन खोजेको भन्दै चौतर्फी विरोध भएको थियो । सत्ता गठबन्धन दलहरुले फागुन २०७९ मा तीनै तहको निर्वाचन गर्ने छलफल गरेका थिए ।
संविधानमा कार्यकाल समाप्त भएको ६ महिनाभित्र चुनाव गराइसक्नुपर्ने व्यवस्था गरिएको छ । त्यसलाई सरकारले र निर्वाचन आयोगल आआफ्नै ढंगबाट ब्याख्या गरेका छन् ।
सत्ता गठबन्धन दलहका नेताहरुले कार्यकाल सकिएको मितिले ६ महिना भनेका छन् भने आयोगले कार्यकाल समाप्त भएको ६ महीनाभित्र गाउँसभा र नगरसभाको निर्वाचन हुनुपर्ने भन्ने सन्र्दभमा उक्त व्यवस्था गरिएको बताएको छ ।
आयोगले सिफारिस गरेकै समयमा चुनाव होला भन्ने सवालमा महत्वपूर्ण बनेको विज्ञहरु बताउँछन् । सरकारले उक्त समयमा निर्वाचन मिति घोषणा नगरे प्रमुख प्रतिपक्ष नेकपा एमालेले सडक आन्दोलन गर्ने चेतावनी दिइसकेको छ । उसले चुनावको मिति घोषणा गर्न सात दिनको अल्टिमेटम समेत दिइसकेको छ ।
राष्ट्रपति विद्यादेवी भण्डारीले पनि आयोगले सिफरिस गरेकै समयमा चुनाव गराउन सरकारलाई निरन्तर दवाव दिइरहेकी छन् । यसकारण पनि सरकार चुनाव गराउनेपर्ने दवावमा छ ।
