काठमाडौं । नेपाल बार एसोसिएसनले चुनाव पर धकेलि स्थानीय तह रिक्त गर्ने कुरा संविधान र कानुन विपरित भएको बताएको छ । बारका महासचिव लीलामणी पौडेलले सोमबार विज्ञप्ति जारी गरेर संविधान र प्रचलित निर्वाचन कानुनका आधारमा तीनै तहको चुनाव हुनुपर्ने बताएका छन् ।
महासचिव पौडेलद्वारा जारी विज्ञप्तिमा भनिएको छ,‘कुनै आग्रह, पूर्वाग्रह, अनुकूलता, प्रतिकूलतालाई विचार गरेर निर्वाचन गर्ने नगर्ने भन्ने विषय हुन सक्दैन । कुनैपनि बहानामा निर्वाचन नगरी वा पर सारी स्थानीय तहलाई रिक्त बनाउने कुरा संविधान र कानून विपरित मात्र नभई लोकतन्त्र र विधिको शासनको समेत उपहास हुन जान्छ ।’ उनले नेपालको संविधान र प्रचलित निर्वाचन सम्बन्धी कानून समेतका आधारमा सबै तहका निर्वाचन समयमा नै गरि लोकतन्त्रको रक्षा र सम्बर्द्धन गर्ने कार्यमा लाग्न नेपाल सरकार तथा सम्बन्धित सबैसँग अपिल समेत गरेका छन् ।
विज्ञप्तिमा विधिको शासन, मानव अधिकार, स्वतन्त्र, सक्षम, निष्पक्ष न्यायपालिका, लोकतन्त्र, संवैधानिक सर्वोच्चता, पारदर्शी र जवाफदेही सरकार, बालिग मताधिकार, प्रेश स्वतन्त्रता, शक्ति पृथकीकरण, नियन्त्रण र सन्तुलन तथा कानून व्यवसायीको हक, हितको सम्बर्द्धन र प्रवद्र्धनको पक्षमा एसोसिएसन रहेको समेत उल्लेख गरिएको छ ।
यसैबीच सत्ता गठबन्धन दलहरुले जेठमा स्थानीय तहको निर्वाचन गर्ने सैद्धान्तिक सहमति गरिसकेका छन् ।
