काठमाडौं । आज सहिद दिवस । कोरोना कहरबीच सिमित कार्यक्रमबीच सहिद दिवस मनाइँदैछ । राणा शासनको अन्त्य गरी प्रजातन्त्र स्थापना र विभिन्न कालखण्डमा देश र जनताको लागि जीवन आहुति दिनेहरुको सम्झनामा सरकारले हरेक माघ १६ गते शहीद दिवस मनाउँदै आएको छ ।
राणा शासनविरुद्ध बोल्दा वि.सं १९९७ मा शहीद शुक्रराज शास्त्रीलाई माघ १० गते काठमाडौंको टेकुस्थित पचलीमा, माघ १३ गते धर्मभक्त माथेमालाई सिफलमा र गंगालाल श्रेष्ठ एवं दशरथ चन्दलाई माघ १५ गते शोभाभगवतीमा मृत्युदण्ड दिइएको थियो । त्यही सम्झनामा वि.सं २०१२ देखि नै तत्कालीन काठमाडौं नगरपालिकाको संयोजकत्वमा प्रत्येक वर्ष माघ १६ गते शहीदको सम्झनामा दिवस मनाउन थालिएको थियो । महानगरपालिकाले माघ १० देखि १६ गतेसम्म साताव्यापी कार्यक्रम गरी शहीद सप्ताह मनाउने गर्दछ ।
कोरोना कहरबीच सिमित उपस्थितिमा आज बिहान शान्तिवाटिका रत्नपार्कदेखि सहिद स्मारक लैनचौरसम्म प्रभातफेरी कार्यक्रम आयोजना गरियो । प्रधानमन्त्री, मन्त्री, सरकारका उच्चपदस्थ अधिकारी, जनप्रतिनिधि, सुरक्षा निकायको ब्याण्ड टोली र मार्चपास टोलीसहितको प्रभातफेरीे शहीद स्मारक लैनचौर पुगी ज्ञातअज्ञात शहीदप्रति श्रद्धाञ्जलि अर्पण गरिएको थियो ।
यसैगरी लखन थापादेखि पछिल्ला स्वतन्त्रताका आन्दोलनमा शहादत प्राप्त गर्ने शहीदको सम्झनामा मन्त्रिपरिषद्को विसं २०६४ जेठ ११ गतेको निर्णय अनुसार उपत्यकाको उत्तरपूर्वी भेगस्थित गोकर्णेश्वरमा निर्माण भइरहेको राष्ट्रिय शहीद स्मारकमा पनि कार्यक्रमको तयारी भइरहेको छ ।
विसं २०६३ अघि शहीद दिवसका दिन राज्यका तर्फबाट शहीदगेटमा विशेष कार्यक्रम गरी दिवस मनाइन्थ्यो । त्यसपछि भने लैनचौरस्थित शहीद स्मारकमा विशेष कार्यक्रम हुन थालेको छ । शहीदगेटमा पनि विभिन्न संघसंस्थाले कार्यक्रम गरी दिवस मनाउने गरेका छन् ।
नेपालमा राणा शासन, पञ्चायत र राजतन्त्रको अन्त्यको लागि हजारौं सहिदले जीवन आहुती दिएपनि उनीहरुका सपना पूरा हुन सकेका छैनन् । नेपालमा शासन व्यवस्था परिवर्तन भएपनि राज्य संचालकको चिन्तन-प्रवृतिमा परिवर्तनमा नआएकाले सहिदले देखेका सपना पूरा नभएका हुन् ।
