काठमाडौँ । गैरकानुनी रुपमा भल्टबाट तीन करोड कर्जा प्रवाह गरेर विवादित बनेको गोर्खाज फाइनान्समा अर्को काण्ड घटाउने खेल सुरु भएको छ । गोर्खाजका तत्कालिन प्रमुख कार्यकारी अधिकृत र नायब कार्यकारी अधिकृतले कार्यालय समयपछि बिना कुनै प्रक्रिया तीन करोड रुपैयाँ झिकेका थिए ।
बैंकिङ कसूर तथा सजाय ऐन, २०७३, बैंक तथा वित्तीय संस्था सम्बन्धी ऐन, २०७३ विरुद्ध कर्जा प्रवाह गर्ने योजनाकार हुन् तत्कालिन नायक प्रमुख कार्यकारी अधिकृत सन्तोष घिमिरे । नेपाल राष्ट्र बैंकका पूर्वकर्मचारी समेत रहेका घिमिरे र तत्कालिन प्रमुख कार्यकारी अधिकृतलालबहाजुर थिङले कर्जा प्रमुख बिदामा भएको मौका छोपी कर्जा नीति विपरित कर्जा प्रवाह गरेर उक्त काण्ड घटाएका थिए ।
एक कर्मचारीका अनुसार यो काण्डका मुख्य योजनाकार नै घिमिरे हुन् । उनकै योजनामा गएको असार ११ गते घिमिरेकै योजनामा ताराचन्द्र बजगाईंको नाममा तीन करोड कर्जा निकालिएको थियो । तर, उक्त कर्जा रकम दीक्षान्त बानियाँको खातामा जम्मा गरिएको थियो ।
दीक्षान्त बानियाँ नेपाली काङ्ग्रेसका नेता तथा पूर्वगृहमन्त्री इन्द्र बानियाँका छोरा हुन । गोर्खाजको शेयर कर्नरिङ गरी शेयरधनीलाई बर्बाद बनाई आफू अर्बपति हुने योजनामा रहेको दीपेन्द्र अग्रवालको साझेदारका रुपमा दीक्षान्त बानियाँ समेत सहभागी भएको एक शेयरधनी बताउँछन् ।
राष्ट्र बैंकका कर्जा सम्बन्धी नीतिविरुद्ध भल्टबाट उक्त रकम निकालिएपछि केही शेयरधनीले राष्ट्र बैंकमा उजुरी समेत दिएका थिए । पछि राष्ट्र बैंकले हस्तक्षेप गर्नु परेको थियो । नियमअनुसार बिना कुनै निर्णय एकपटकमा १० लाख रुपैयाँभन्दा बढी झिक्न मिल्दैन ।
पूर्व गोर्खा समुदायको खुन पसिनाबाट निर्माण भएको फाईनान्सलाई केही व्यक्तिहरुले कमाउँ धन्दा बनाउँन प्रयास गरेका थिए । गैरकानूनी धन्दा राष्ट्र बैंकसम्म पुगेपछि उक्त फाइल झिकाएर अनुसन्धान गरिएको थियो । राष्ट्र बैंकले दोषी ठहर भएका घिमिरेलाई कारवाही गर्न तत्कालिन बोर्डलाई निर्देशन दिएको थियो । तर, त्यो भन्दा पहिले नै राजिनामा गरेर घिमिरेले गोर्खा फाईनान्स छोडेका थिए । राष्ट्र बैंकले कारवाहीको पत्र तयार गर्ने संकेत पाएपछि घिमिरेले रातारात राजिनामा दिएका थिए । हालका संचालक समितिका अध्यक्षको प्रस्तावमा तिनै घिमिरेलाई फेरि प्रमुख कार्यकारी अधिकृत बनाउन खेल सुरु भएको छ ।
संस्था डुबाउने खेलाडीको रुपमा रहेका घिमिरेलाई नै प्रमुख बनाउन लागेपछि केही शेयरधनीले बिरोध जनाइरहेका छन् । उनीहरुले संस्था डुबाउने नियत भएका व्यक्तिलाई कार्यकारी प्रमुख बनाउन नहुने बताउँदै आएका छन् ।
शेयर कर्नरिङ गरिएको र सर्वसाधरणलाई डुबाउँदै आफूले शेयरबापत अर्बौं रुपैयाँ कुम्ल्याउने र फाइनान्स कब्जा गर्ने योजनामा रहेका शेयर दलाल दीपेन्द्र अग्रवालको योजनामा काँग्रेत नेता बानियाँ रहेको बताइएको छ । उनकै सेटिङमा बानियाँले छोरालाई अग्रवालसँग मिलेर उक्त गैरकानूनी कार्यमा छोरालाई अगाडि सारेका थिए । एक शेयरधनीका अनुसार गोर्खा समुदायको पसिनाबाट निर्माण भएको फाईनान्सलाई जबरजस्त आफ्नो कब्जामा पार्न अग्रवाल निरन्तर लागिरहेका छन् ।
यतिबेला आफैँभित्र कृत्रिम शेयरको मूल्यवृद्धि गरिएको र आफू अनुकुल वातावरण बनाएकाले जसरी पनि साधारणसभा गरेर आफू अनुकुल फाइनान्स बनाउने र सेयर सर्वसाधारणलाई बिक्री गर्ने योजना अग्रवालको छ ।
केही कर्मचारीले यस्तो गैरकानूनी कार्यको विरोध गरेकै कारण यो घटना सार्वजनिक भएको थियो । यसरी बैंकिङ कसुरमा मुछिएका व्यक्तिलाई नै पुनः संस्थाको प्रमुख बनाउने खेल सुरु भएपछि केही शेयरधनी आक्रोसित भएका छन् । यो विषयमा जानकारी लिन संचालक समितिका अध्यक्ष गौरव बुढाथोकीसँग सम्पर्क हुन् सकेन ।
यस्तो थियो राष्ट्र बैंकमा परेको उजुरी
