काठमाडौं । नेकपा माओवादी केन्द्रले अहिलेकै अवस्थामा अमेरिकी सहयोग परियोजना मिलेनियम च्यालेन्ज कर्पोरेशन (एमसीसी) संसदमा पास नगर्ने बताएको छ । एमसीसीबारे सुझाव दिन अध्ययन कार्यदल बनाउने निर्णय गरेको छ ।
शनिबार बसेको स्थायी समिति बैठकले कार्यदल बनाएर अध्ययन गर्ने र सो कार्यदलको सुझावको आधारमा पार्टीको आधिकारिक धारण बनाउने निर्णय गरेको छ । बैठकपछि प्रवक्ता कृष्णबहादुर महराले कार्यदलको सुझाव लिएर आवश्यक परिमार्जन गरेर अघि बढ्ने जानकारी दिए । सुझाव नआएसम्म एमसीसीबारे पार्टीले थप निर्णय नगर्ने महराले बताए ।
त्यसैगरी बैठकमा स्थानीय तह, प्रदेश र संघीय निर्वाचन एकैपटक गर्ने विषयमा छलफल भएको प्रवक्ता महराले जानकारी दिए । उनले तीन वटै तहको निर्वाचन एकैपटक गर्ने विषयमा छलफल भएको र आजै बस्ने संयन्त्रको बैठकमा पनि छलफल गरिने बताए ।
आजै बस्ने सत्ता गठबन्धनको संयन्त्रको बैठकमा छलफल भएपछि मात्रै पार्टीको आधिकारिक धारणा सार्वजनिक गरिने महराले बताए ।
निर्वाचन आयोगले बैशाख १४ गते स्थानीय तहको निर्वाचन गर्न सकिने प्रस्ताव गरेको थियो । सोही समयमा निर्वाचन गर्नेबारे सत्तारुढ दलका नेताहरुले छलफल गरिरहेका छन् ।
