काठमाडौं । कोरोना भाइरस संक्रमणको तेस्रो लहरको केन्द्र बनिरहेको काठमाडौं उपत्यकामा आजबाट सवारी सधानमा जोर बिजोर प्रणाली लागु हुने भएको छ ।
बिहीबार बसेको उपत्यकाका प्रमुख जिल्ला अधिकारीहरुले बैठकले शुक्रबार राति १२ बजेबाट लागू हुने गरी उक्त निर्णय गरेका हुन् । सार्वजनिक र निजी सवारी साधन जोर गते जोर र बिजोर गते बिजोर नम्बरका मात्र चल्न पाउने छन् ।
त्यस्तै, सार्वजनिक सवारीका चालक र सहचालकले मास्क र फेस सिल्ड अनिवार्य लगाउनुपर्नेछ ।
तीनवटै प्रमुख जिल्ला अधिकारीको बैठकले स्वास्थ्य सामग्री बोकेका सवारीसाधन, एम्बुलेन्स, दमकल, शववाहन तथा पेट्रोलियम पदार्थसहित अनिवार्य आवश्यकता पर्ने ढुवानीका सामान बोकेका सवारीलाई जोर बिजोर लागू नहुने निर्णय समेत गरेको छ ।
भिडभाड कम गर्न सार्वजनिक र सरकारी निकायमा आलोपालो प्रणालीबाट सेवा प्रवाह गर्ने निर्णय समेत गरिएको छ ।
तर जोर बिजोर प्रणालीले सार्वजनिक सवारी साधानमा झन कोचाकोच र भिडभाड हुने भन्दै सरोकारवालाहरुले चिन्ता व्यक्त गरेका छन् ।
