काठमाडौं । विप्लव नेतृत्वको नेपाल कम्युनिस्ट पार्टी परित्याग गरी दर्जनबढी नेताहरु नेकपा (क्रान्तिकारी माओवादी)मा समाहित भएका छन् । नेकपको ब्यूरो संयोजक भइसकेका पुस्कर श्रेष्ठ, तत्कालिन मध्यकमाण्डको कार्यसचिव भएर जिम्मेवारी समालेका केदार खतिवडा नेकपाको उद्योग व्यापार महासंघको अध्यक्ष युवराज पराजुलीसहित दर्जन नेता समोबार आयोजित पुनर्मिलन कार्यक्रममा समाहित भएका छन् ।
सोमबार पार्टी कार्यालय कुपण्डोलमा भएको एक कार्यक्रममा क्रान्तिकारी माओवादीका महासचिव मोहन वैद्य ‘किरण’ले खाँदा ओढाएर पार्टीमा स्वागत गरेका थिए ।
त्यसैगरी नेकपाका पूर्वका युवा नेता तारा थापा, जीपी चौलागाई, ज्ञानेन्द्र बुढाथोकी, रामबहादुर तिरुवा, प्रभात भट्टराई, हिरा शाही, शिवहरी घिमिरे, मेलम योञ्जनलगायत क्रान्तिकारी माओवादीमा समाहित भएका छन् । त्यस्तै गोपाल किराँतीको नेकपा माओवादी केन्द्रका सचिवालय सदस्य विमल निरौला, केन्द्रीय सदस्यहरु प्रकाश राई, अप्सरा बानियाँ र गणेश निरौला क्रान्तिकारी माओवादीमा ध्रुवीकृत भएका छन् ।
कार्यक्रममा विप्लवले क्रान्तिकारी कार्यदिशा छोडेर सुधारवादी कार्यदिशा समातेको र गोपाल किरातीले विपश्वनालाई पार्टीको कार्यदिशा बनाएर शुन्यवादी कार्यदिशा समात्न पुगेकोले क्रान्तिकारी माओवादीमा ध्रुवीकृत भएको बताए ।
वैद्यले विप्लव र प्रचण्डमा केही फरक नभएको समेत बताए । वैद्यले भने, ‘विप्लवजीले हामीसँग अलग हुनेबेला तुरुन्तै सशस्त्र संघर्ष गर्नुपर्यो, यो संविधान बनाउन दिनुहुँदैन भन्नुभएको थियो तर अहिले आएर जनमत संग्रहबाट समाजवाद आउँछ भन्नुभएको छ । प्रचण्डजीले शान्तिपूर्ण तरिकाले समाजवाद आउँछ भन्ने र विप्लवजीले जनमत संग्रहबाट समाजवाद आउँछ भन्ने । आखिर के रैछ त भन्नृ छर्लङ हुँदै गइरहेको छ ।’
महासचिव वैद्यले मोहनविक्रम सिंह र विप्लव नेतृत्वको पार्टीसँग पार्टी एकताका लागि धेरै पटक प्रयास गरेपनि उनीहरुले खासै जाँगर नदेखाएको खुलासा समेत गरे । अब एकता र ध्रुवीकरणको प्रक्रिया सुरु भएको बताए । क्रान्तिकारी र अवसरवादीहरुको कित्ता छुट्टिदै गएको बताउनु वैद्यले अब क्रान्तिकारी माओवादी छलाङ हान्दै अगाडि बढ्ने पनि उद्घोष समेत गरे ।
कार्यक्रममा नेकपा नेता पुष्करले नेकपा क्रान्तिकारी पार्टी नभएको र कार्यकर्ताहरुलाई आन्दोलन गर्न लगाएर चन्दा उठाउने समूहमा परिणत भएकोले आफूहरुले परित्याग गरेको बताए ।
