काठमाडौं । निर्वाचन आयोगले आज सर्वदलीय बैठक बोलाएको छ । आयोगले स्थानीय तहको चुनावबारे छलफल गर्न बैठक बोलाएको हो । पालिकाको चुनाव मुख्य एजेण्डा भएपनि बैठकमा आउँदा माघ १२ गते हुन लागेको राष्ट्रिय सभा चुनावबारे पनि छलफल हुनेछ ।
बिहान ११ बजे बोलाइएको बैठकमा आयोगले मतदाता नामावली अद्यावधिकको पछिल्लो विवरणबारे राजनीतिक दलहरुलाई जानकारी गराउने छ भने बारेमा नेताहरुका धारणा सुन्ने आयोगले जनाएको छ ।
आयोगले बैठकमा पालिका, प्रदेश वा प्रतिनिधि सभामा प्रतिनिधित्व गर्ने १७ दललाई बोलाएको छ । यसअघि आयोगका पदाधिकारीले प्रधानमन्त्री शेरबहादुर देउवालाई भेटेर पालिकाको चुनाव निर्धारित मितिमै गर्नुपर्ने सुझाव दिइ सकेका थिए । पुस ९ गते प्रधानमन्त्री देउवालाई भेटेर आयोगका पदाधिकारीले वैशाख १४ र वैशाख २२ गते पालिकाको चुनाव गर्न प्रस्ताव गरेका थिए ।
तर सरकारले आयोगको सिफारिसअनुसार चुनावी कार्यक्रमबारे कुनै गृहकार्य गरेको छैन । स्थानीय तह निर्वाचन ऐन २०७३ को व्यवस्थाअनुसार स्थानीय तहका पदाधिकारीको पदावधि आउँदो जेठ ५ मा समाप्त हुँदैछ ।
संविधानको धारा २२५ मा स्थानीय जनप्रतिनिधिको कार्यकाल समाप्त भएको ६ महिनाभित्र चुनाव गर्नुपर्ने भनिए पनि स्थानीय तह निर्वाचन ऐन २०७३ को दफा ३ बमोजिम कार्यकाल समाप्त हुनुभन्दा दुई महिनाअघि नै चुनाव हुनुपर्ने व्यवस्था छ ।
