काठमाडौं । विश्व स्वास्थ्य सङ्गठन (डब्ल्यूएचओ) कोभिड १९ को ओमिक्रोन भेरियन्ट खोप नलगाएकाहरुलाई बढी खतरनाक रहेको बताएको छ । डब्ल्यूएचओका महानिर्देशक टेड्रोस एड्नोहम गेब्रेयससले ओमिक्रोन डेल्टाभन्दा कम गम्भीर भाइरस भएपनि खोप नलगाएकाहरुका लागि बढी खतरनाक रहेको बताएका छन् ।
कोभिड-१९ बारे गरिएको पत्रकार सम्मेलनमा बोल्दै गेब्रेयसस भन्छन्- ‘ओमिक्रोन डेल्टा भन्दा कम गम्भीर भाइरस हो तर विशेष गरी खोप नलगाएकाहरूका लागि भने यो खतरनाक नै हुन्छ ।’ उनले यसको सङ्क्रमण दर तीव्र रहेको र सबैतिर फैलिएकाले सतर्क रहनसमेत आग्रह गरे ।
अफ्रिकाको कोभिड खोपको दरलाई उल्लेख गर्दै गेब्रेयससले अफ्रिकामा ८५ प्रतिशतभन्दा बढी मानिसहरूले खोपको एक खुराक प्राप्त नगरेको बताएँ । उनले यो अन्तरलाई बन्द नगरेसम्म महामारीको तीव्र चरण समाप्त गर्न नसक्ने ठोकुवा गरे ।
‘हामी प्रगति गर्दैछौँ, डिसेम्बरमा, कोभ्याक्स अन्तर्गत नोभेम्बरमा पठाइएको डोजको सङ्ख्या दोब्बरभन्दा बढी पठाउँछौँ र आउँदा दिनमा एक अर्ब खोप डोज पठाउने प्रयास गर्छौँ’ उनले भने ।
डब्ल्यूएचओ प्रमुखले गएको वर्ष हामीले भोगेका केही आपूर्ति अवरोधहरू अहिले सहज हुन थालेको तर यस वर्षको मध्यसम्ममा प्रत्येक देशको ७० प्रतिशत जनसङ्ख्यालाई खोप लगाउने लक्ष्यमा पुग्न अझै लामो यात्रा गर्न बाँकी रहेको समेत उल्लेख गर्दै भने, ‘९० देशले अझै ४० प्रतिशत लक्ष्यमा पुग्न सकेका छैनन् र तीमध्ये ३६ देशले आफ्नो जनसङ्ख्याको १० प्रतिशतभन्दा कम खोप लगाएका छन् ।’
डब्ल्यूएचओ र हाम्रा साझेदारहरूले यी देशहरूलाई नेतृत्व र समन्वयमा, आपूर्ति दृश्यताको कमी, प्रदान गरिएका खोपहरूको छोटो शेल्फ–लाइफ, सीमित कोल्ड चेन क्षमता, खोप आत्मविश्वास, स्वास्थ्यकर्मीको अभाव र प्रतिस्पर्धी प्राथमिकताहरूमा सामना गर्ने अवरोधहरू हटाउन सक्रिय रूपमा समर्थन गरिरहेको समेत डब्ल्यूएचओका प्रमुखले गेब्रेएससले बताए ।