काठमाडौं । काठमाडौंसहित हिमाली क्षेत्रमा गएरातिबाट हिमपात भइरहेको छ । पश्चिमी न्यून चापीय प्रणालीको प्रभावका कारण काठमाण्डौसहित देशका धेरै भागमा वर्षा सुरु भएको थियो । हिमाली क्षेत्रमा रातिबाटै र चन्द्रागिरिसहितका मकवानपुरको दामनलगायतका क्षेत्रमा विहानबाट हिउँ परेको हो ।
आज दिनभरी नै हिमपात हुने मौसमविद्ले बताएका छन् । काठमाण्डौ उपत्यकासहित देशभर वर्षा भइरहेको छ । हिमाली जिल्लामा बाक्लो हिमपात भएको छ । वर्षा र हिमपातका कारण देशभर अधिकतम तापक्रम घटेको छ । यसले चिसो बढाएको छ ।
यसैबीच कर्णालीको हिमाली र उच्च पहाडी क्षेत्रको जनजीवन कष्टकर बनेको छ । उपल्लो डोल्पा, मध्य डोल्पाका साथै जाजरकोटको बारेकोट र रुकुम पश्चिमको आठबिसकोट नगरपालिकाको माथिल्लो क्षेत्रमा हिउँ परिरहेको छ । कर्णालीका अन्य हिमाली जिल्ला मुगु र हुम्लामा पनि केही दिन पहिलेदेखि नै हिमापात भइरहेको छ ।
हिमपातसँगै अधिकांश ठाउँको फोन सेवा समेत प्रभावित भएको छ । बिहानैदेखि यी जिल्लाको चहलपहल ठप्प भएको त्यहाँस्थित प्रहरी कार्यालयले जनाएका छन् ।
त्यसैगरी सुदूरपश्चिमका उच्च क्षेत्रमा हिमपात भइरहेको छ । हिमपातका कारण भीमदत्त राजमार्ग अवरुद्ध भएको छ । विहानैबाटै हवाइ सेवा प्रभावित भएको छ ।
वर्षा र हिमपातपछि किसान भने खुशी भएका छन् । वर्षाका कारण गहुँ र तरकारीलाई राहत भएको छ ।
