काठमाडौँ । केएमसी कलेजमा विद्यार्थी मृत्यु प्रकरणको विरोधमा उत्रेका विद्यार्थीलाई प्रहरी गिरफ्तार गरेको छ । प्रहरीले अखिल क्रान्तिकारीका केन्द्रीय सदस्य गोविन्द विष्टसहित १२० विद्यार्थीलाई गिरफ्तार गरेको छ ।
बागबजारस्थित केएमसी कलेजमा कक्षा ११ मा अध्ययनरत विद्यार्थीको मृत्युको छानविनको माग गर्दै विरोध प्रदर्शनमा उत्रिएका विद्यार्थीहरुलाई कलेज प्रशासनको सहयोगमा प्रहरीले गिरफ्तार गरेको हो ।
सोमबार दिउँसो कक्षामा अध्ययनरत सुशिल सहानीको बाथरुममा मृत्यु भएको भनिएको छ । कलेजमा अध्ययनरत विद्यार्थीहरुले घटनाको छानविन गर्न माग गरेका थिए । विद्यार्थीका अनुसार घटनाको छानविन गर्नुको साटो प्रशासनले प्रहरी बोलाएर विद्यार्थीलाई गिरफ्तार गर्न लगाएको थियो ।
विप्लव नेतृत्वको नेपाल कम्युनिस्ट पार्टी निकट अखिल क्रान्तिकारीका काठमाडौँ इन्चार्ज समेत रहेका विष्टलाई महानगरीय प्रहरी वृत सिंहदरबारमा राखिएको छ भने अन्य विद्यार्थीलाई भृकुटीमण्डपस्थित नेपाल पुलि क्लबमा राखिएको छ ।
अखिल क्रान्तिकारीका जिल्ला सदस्य राजेश राजेश रावललाई पनि प्रहरीले गिरफ्तार गरेको छ । आफ्नो कमजोरी ढाकछोप गर्न कलेज प्रशासनले प्रहरी लगाएर विद्यार्थीमाथि धरपकड गरेको अखिल क्रान्तिकारीले जनाएको छ ।
केएमसी कलेजले महंगो शूल्क असुल गर्ने गरेको तर भौतिक पूर्वाधारलगायत व्यवस्थापमा लथालिंग रहेको कजेलमा अध्ययनरत विद्यार्थीले बताएका छन् ।
कलेजमा अध्ययनरत विद्यार्थीले घटनाको छानविन र मृतक साहनीका परिवारलाई क्षतिपूर्ती नदिएसम्म आफूहरुको विरोध प्रदर्शन जारी रहने बताएका छन् । घटनाको सत्यतथ्य छानविन नगरी प्रहरीको डरधम्की देखाएर कलेज प्रशासनले गम्भीर गल्ती गरेको बताउँदै विष्टले आफूहरुको विरोध जारी रहने बताए ।