काठमाडौं । नेपाली काँग्रेसको उपसभापतिमा पूर्णबहादुर खड्का र धनराज गुरुङ विजयी भएका छन् । १४ औं महाधिवेशनमा भएको निर्वाचन मतगणना राति सकिएको थियो ।
काँग्रेसको केन्द्रीय निर्वाचन समितिले सार्वजनिक गरेको नतिजाअनुसार खड्काले २१२१ मत र गुरुङले १९०८ मत ल्याएका ल्याएर विजयी भएका हुन् । खड्का सभापतिमा निर्वाचित शेरबहादुर देउवा प्यानल र गुरुङ सभापतिमा पराजित भएका शेखर कोइरालाको प्यानबाट उपसभापतिमा चुनाव लडेका थिए ।
देउवाको प्यानलबाट उपसभापतिमा उठेका विजय कुमार गच्छदारले पराजित भएका छन् । उनले १९०६ मत ल्याएका छन् । यो गुरुङभन्दा २ मत मात्रै कम हो ।
त्यस्तै उपसभापतिका अर्का उम्मेदवार चन्द्र भण्डारीले १५८०, सुजाता कोइरालाले ६४४, महेश आचार्यले ५८९ र दिव्यश्वरी शाहले १३२ मत प्राप्त गरेका छन् ।
यसपटक उपसभापतिको दौडमा देउवाको प्यानलबाट खड्कासहित गच्छदार, शेखर कोइराला समूहबाट गुरुङसहित चन्द्र भण्डारी, प्रकाशमान सिंह प्यानलबाट सुजाता कोइराला र विमलेन्द्र निधि प्यानलबाट दिव्यश्वरी शाहले चुनावी प्रतिस्पर्धा गरेका थिए । महेश आचार्य भने स्वतन्त्रतर्फबाट उठेका थिए ।
काँग्रेसको १४ औं महाधिवेशन अन्तर्गत महामन्त्री पदको मतगणना आज विहानबाट सुरु गर्ने तयारी भइरहेको छ । काँग्रेसको नयाँ नेतृत्वको लागि भएको चुनावको सबै परिणाम आउन पुस ५ गतेसम्म लाग्ने बताइएको छ ।