काठमाडौं । नेपाली कांग्रेसको १४ औं महाधिवेशनबाट शेरबहादुर देउवा सभापतिमा निर्वाचित भएका छन् । दोस्रो चरणको चुनावमा देउवा पुनः सभापतिमा निर्वाचित भएका हुन् ।
मंगलबार भएको दोस्रो चरणको मतदानमा जम्मा खसेको मत ४६२३ मध्ये देउवाले २७३३ प्राप्त गरेका थिए । उनका प्रतिस्पर्धी नेता शेखर कोइरालाले १८५५ मत पाएका थिए भने ३५ बदर भएको थियो ।
यसअघि २०७२ मा भएको १३औं महाधिवेशनमा पनि दोस्रो चरणको मतदानबाटै सभापतिमा निर्वाचित भएका थिए । कुल ४ हजार ७४३ महाधिवेशन प्रतिनिधिमध्ये पहिलो चरणमा ४ हजार ६६९ जनाले मतदान गरेका थिए । तर सभापतिका पाँचमध्ये कुनै पनि उम्मेदवारले बहुमत ल्याउन सकेनन् ।
सबभन्दा धेरै मत पाएका देउवाले २ हजार २५८ र शेखरले १ हजार ७०२ मत पाएका थिए । प्रकाशमान सिंहले ३७१, विमलेन्द्र निधिले २५० र कल्याण गुरुङले २२ मत पाएका थिए । दोस्रो चरणको चुनावमा सिंह, निधि र गुरुङले देउवालाई समर्थन गरेका थिए ।
कांग्रेसमा यसपटक नेतृत्व परिवर्तनको मुद्दा उठे पनि त्यसो हुन सकेन । संस्थानपन इतर समूह पहिलो चरणमा तितरबितर हुँदा र दोस्रो चरणमा शेखरबाहेकका अरु नेता देउवातिर उभिँदा दोस्रो चरणमा देउवाको सहज जित भएको हो ।
लामो समयदेखि देउवाको विरुद्धमा उभिँदै आएका नेता प्रकाशमान सिंहले यसपटक साथ दिए । सिंहले समर्थन कोइराला परिवारले आफूलाई नपत्याएको भन्दै देउवालाई साथ दिएका थिए । सिंहले देउवालाई साथ दिँदा पनि शेखर पाएको मत सम्मानजनक नै हो ।