काठमाडौं । नेकपा (एमाले) को उपाध्यक्षमा पूर्वमाओवादी नेता रामबहादुर थापा ‘बादल’ निर्वाचित भएका छन् । उनले निर्वाचित हुनेमध्येमा सबैभन्दा कम १७६८ मत पाएका छन् ।
निर्वाचन समितिले औपचारिक रुपमा मत परिणामम सार्वजनिक नगरेपनि सबैभन्दा धेरै मत अष्टलक्ष्मी शाक्यले पाएकी छन् । शाक्यले १९७६ मत पाएकी छन् । जबकी २०९६ मत खसेको थियो ।
त्यस्तै सुरेन्द्र पाण्डेले १९२५, सुवासचन्द्र नेम्वाङले १८६५, विष्णु पौडेलले १८५६, युवराज ज्ञवालीले १८४२ मत प्राप्त गरेका छन् । उपाध्यक्षमा उम्मेदवारी दिएका नेता घनश्याम भुसालले भने ७२५ मत ल्याएर पराजति भएका छन् । ओली पक्षले प्यानल नै बनाए बाँडेको अवस्थामा पनि भुसालले पाएको मतलाई सम्मानजनक मानिएको छ ।
उपाध्यक्षमा भुसालले उम्मेदवारी दिएकै कारण चुनाव भएको थियो । ओलीले पदाधिकारीमा नाम नपारेपछि भुसालले उम्मेदवारी दिएका थिए ।
सचिवमा भएको मतदानको परिणाम सार्वजनिक हुन सकेको छैन । ७ सचिवमा ९ जनाले उम्मेदवारी दिएका छन् । सचिवमा पूर्वमाओवादी नेता टोपबहादुर रायमाझी र लेखराज भट्ट चुनावी मैदानमा छन् ।
चुनावमाको अन्तिममा ओलीले पक्षले आचारसंहित विपरित प्यानल बनाएर प्रतिनिधिलाई बाँडेपछि प्रस्ताव गरिएका सबै नेताहरु विजयी हुने देखिएको छ । आफू निकट कार्यकर्तालाई ओली पक्षले प्यानलमा भोट हाल्न ह्वीव नै लगाएको बताइएको छ ।
