काठमाडौं । नेकपा (माओवादी केन्द्र) का अध्यक्ष प्रचण्डले माओवादी नेतृत्व र आन्दोलनको अगाडि नयाँ चुनौती र अबसर खडा भएको बताएका छन् । विगतका उपलब्धीको अपनोत्व ग्रहण गर्दै बाँकी उपलब्धी संघर्ष गर्ने बेला आएको बताए ।
शनिबार ७५३ वटा स्थानीय तह र माओवादीले सम्पर्क समन्वय समिति र विशेष समितिसमेत गरी कूल ७७६ वटा पालिका स्तरीय सम्मेलनको उद्घाटन गर्दै प्रचण्डले माओवादी आन्दोलनलाई विसर्जन गर्ने र जनतालाई अधिकारविहीन बनाउने षड्यन्त्र भइरहेको बताए । इट्टाको जवाफ पत्थरले दिन तयारी गर्न युवाहरुलाई प्रचण्डले निर्देशन समेत दिए ।
सम्मेलन उद्घाटन गर्दै प्रचण्डले शुभकामना समेत दिए । उनले सकेसम्म सहमतिकै आधारमा नेतृत्वय चयन गर्न र नभएपनि लोकतान्त्रिक विधि अपनाउन समेत निर्देशन दिए । शनिबार १ बजे अध्यक्ष प्रचण्डले सबै पालिका सम्मेलनलाई एकैपटक भर्चुअल माध्यमबाट उद्घाटन गरेका थिए ।
यसअघि मङ्सिर ४ गते सबै वडाको सम्मेलन गरी नयाँ नेतृत्वसमेत चयन भइसकेको छ । वडाबाट निर्वाचित भएका प्रतिनिधिका आधारमा गाउँपालिकामा १५० जनाका दरले सहभागी हुनेछन् । यस्तै नगरमा २००, उपमहानगरमा ३०० सय र महानगरमा ४०० प्रतिनिधिको उपस्थितिमा अधिवेशन हुने निर्वाचन समितिले जनाएको छ ।
माओवादी केन्द्रले यी मङ्सिर २५ गतेका लागि प्रदेश सम्मेलनको आयोजना गर्नेछ भने आगामी पुस ११ देखि १३ गतेसम्म राष्ट्रिय सम्मेलन गर्दैछ ।
