काठमाडौं । आज सर्वोच्च अदालतको फुलकोर्ट बैठक बस्दै छ । गोलाप्रथा प्रक्रियाबाट पेशी तोकेर इजलास बस्न तयार भएका न्यायाधीशहरु फुलकोर्ट बैठक बसेर अगाडि बढ्न तयार भएका छन् ।
कानुन व्यवसायीहरुले प्रधानन्यायाधीश चोलेन्द्र शमशेर जबराको राजिनामा माग्दै आन्दोलनलाई पुनरावेदन अदालतसम्म पुर्याएको बेला न्यायाधीशहरु गोलाप्रथाबाट पेशी तोकेर इजलास बस्न तयार भएका छन् ।
जबराको राजिनामाको पक्षमा रहेका १८ न्यायाधीशको बुधबार बसेको बैठकले आज फुलकोर्ट बैठक बसेर अगाडि बढ्न सहमत भएका थिए ।आजको बैठकले आगामी बुधबादेखि गोलाप्रथाबाट पेसी तोक्ने निर्णय गर्ने बताइएको छ ।
प्रधानन्यायाधीश जबराको अधिकार कटौती गर्ने भन्दै गोलाप्रथामा जान तयार भएका थिए । न्यायाधीहरुले प्रधानन्यायाधीश जबराले न्यायालयको गरिमा कायम राख्न नसकेको भन्दै राजिनामाको पक्षमा उभिएर इजलास बहिस्कार गरेको महिना पुगेको छ ।
प्रधानन्यायाधीश जबरा अनसन्तुष्ट न्यायाधीशको मागअनुसार गोलाप्रथामा पेशी तोक्न तयार भएपनि राजिनामा नगर्ने अडानमै छन् । न्यायाधीशहरु गोलाप्रथामा गएपछि आफूहरुको आन्दोलन कमजोर हुने भन्दै कानुन व्यवसायीहरुले आन्दोलनलाई उच्च अदालतसम्म पुर्याएका छन् । अब जिल्ला अदालतमा पनि धर्ना दिने चेतावनी दिएका छन् ।
त्यसैगरी कानुन व्यवसायीहरुले आफ्नो आन्दोलनलाई कमजोर हुने गरी जबरासँग मिलेमा अन्य न्यायाधीशहरुविरुद्ध पनि आन्दोलन गर्ने चेतावनी दिएका छन् ।
अन्तुष्ट न्यायाधीशहरुको बुधबार भएको बैठकले गोलाप्रथामा गएपनि प्रधानन्यायाधीश जबरालाई भने अस्वीकार गर्नेमा एक मत भएका छन् ।
