काठमाडौं । महाधिवेशनको पूर्वसन्ध्यामा नेकपा एमालेको स्थायी कमिटी बैठक बसेको छ । ललितपुरको च्यासलस्थित तुलसीलाल प्रतिष्ठानमा जारी बैठकले मंसिर १० गतेदेखि सुरु हुने महाधिवेशनको तयारीलगायतका विषयमा छलफल भइरहेको छ ।
स्थायी समिति सदस्य योगेश भट्टराईका अनुसार व्यवस्थापन, उद्घाटन र बन्दशस्त्र, प्रतिनिधि छनोटको समिक्षा, प्रतिनिधि मनोनयन र निर्वाचन आयोगको कामबारे गरी पाँच एजेण्डा बैठकमा पेश गरिएका छन् ।
यो सँगै बैठकमा स्थायी समिति सदस्यहरुले अध्यक्षमा केपी शर्मा ओलीलाई सर्वसम्मत गराउने र उपाध्यक्ष भीम रावलको उम्मेदवारी फिर्ता लिने विषयमा छलफल हुने एक स्थायी समिति सदस्यले बताए । बैठकमा एजेण्डा नबनाइएपनि रावलको उम्मेदवारी फिर्ता लिनेबारे पनि सदस्यहरुले धारणा राखेको बताइएको छ । तर, रावलले आफूले उम्मेदवारी घोषणा गरिसकेकोले अगाडि बढ्ने अडान राखेका छन् ।
त्यसैगरी पार्टीले मनोनयन गर्ने ९६ जनाको पनि टुंगो लगाउने बताइएको छ । यही १० गतेदेखि १२ गतेसम्म चितवनमा हुन लागेको एमालेको १० औं राष्ट्रिय महाधिवेशनमा २ हजार मत्हायसधिवेशन प्रतिनिधि सहभागी हुँदैछन् । एमालेले १९०० बढी महाधिवेशन प्रतिनिधि चयन गरिसकेको छ ।
दसौँ महाधिवेशनमा सहभागी हुने प्रतिनिधिमध्ये ५ प्रतिशत मनोनयनबाट आउने विधानमा व्यवस्था भएअनुसार आजको बैठकले मनोनयन सूची केन्द्रीय कमिटीमा पठाउनेछ ।