काठमाडौँ । नेपाल कम्युनिस्ट पार्टी (माओवादी केन्द्र) का प्रचण्ड र नेकपाका महासचिव विप्लवबीच भेटवार्ता भएको छ । माओवादी केन्द्रका स्थायी समिति सदस्य तथा प्रवक्ता कृष्णबहादुर महराको पहलमा भएको भेटवार्तामा विप्लवले अघिल्लो सरकारसँग भएको तीन बुँदे सहमति कार्यन्वयनमा सरकारले ढिलाई गरिरहेको गुनासो गरेका थिए ।
त्यसैगरी विप्लवले भेटमा तीन बुँदे सहमति कार्यान्वयनको लागि पहल लिन आग्रह गरेको प्रचण्डको सचिवालयलाई उदृत गर्दै माओवादी केन्द्रका एक नेताले बताए ।
भेटवार्तामा पार्टी एकता र अभवको क्रान्तिको मोडेलबारे पनि संक्षिप्तमा छलफल भएको छ । विप्लवले अहिलेको व्यवस्था नै सबै समस्याको कारण भएको वैज्ञानिक समाजवाद स्थापनाको लागि आफू सहकार्य र एकताको लागि तयार भएको बताएका थिए । जवाफमा प्रचण्डले जनताको हितमा हुने अग्रगामी कदम उठाउँन आफू तयार भएको बताएका थिए ।
पार्टी निकट दलित मुक्ति मोर्चाको राष्ट्रिय सम्मेलन उद्घाटनको क्रममा विप्लवले धनगढीमा माओवादी केन्द्रसँग एकता गर्न आफू तयार भएको सन्देश दिएका थिए । त्यसपछि पहिलो पटक भएको आजको भेटलाई महत्वको साथ हेरिएको छ ।
भेटवार्तामा माओवादी केन्द्रका प्रवक्ता कृष्णबहादुर महरा पनि सहभागी थिए ।
- फाइल फोटो
