काठमाडौं । आज करिब ६ शताब्दी यताकै सबैभन्दा लामो चन्द्र ग्रहण लाग्दैछ । यो सन् २०२१ को अन्तिम चन्द्र ग्रहण पनि हो । खगोलविद्का अनुसार यति लामो चन्द्र ग्रहण ५८० वर्षपछि पहिलो पटक लाग्दैछ ।
आज लाग्ने चन्द्र ग्रहण तीन घण्टा २८ मिनेट २४ सेकेण्ड लामो हुनेछ । चन्द्र ग्रहणलपे चन्द्रमाको ९७ प्रतिशत भाग ढाक्नेछ भने दिउँसो १ बजे उच्चविन्दुमा पुग्नेछ । चन्द्र ग्रहण एसिया, अमेरिका, उत्तरी युरोप, अष्ट्रेलिया तथा प्रशान्त महासागरीय क्षेत्र लगायतबाट देखिनेछ ।
खगोल विज्ञान अनुसार सूर्य र चन्द्रमाको बीचमा पृथ्वीमा पर्दा चन्द्र ग्रहण लाग्दछ भने ज्योतिष शास्त्रमा चन्द्र ग्रहणलाई निकै महत्वपूर्ण लिइ राहु र केतुले चन्द्रमालाई समाउँदा चन्द्र ग्रहण लाग्ने मान्यता राखिन्छ ।
सूर्य र चन्द्रमाको बीचमा पृथ्वी गएको बेला सूर्यको प्रकाश चन्द्रमामा पर्न पाउँदैन र पृथ्वीको छायाँ पर्दा चन्द्र ग्रहण लाग्ने वैज्ञानिकहरुले बताएका छन् । चन्द्र ग्रहण पूर्णिमाको दिनमा मात्र लाग्दछ ।
यसअघि सन् १४४० को फेब्रुअरी १८ मा सबैभन्दा लामो चन्द्रग्रहण लागेको थियो । आजको चन्द्र ग्रहणपछि अब ८ फेब्रुअरी २६६९ का दिनमात्र यस्तो लामो चन्द्रग्रहण लाग्नेछ ।
