काठमाडौं । नेपाल कम्युनिस्ट पार्टीले आह्वान गरेको नेपाल बन्दको पूर्वसन्ध्यामा देशभर मशाल जुलुस भएका छन् । पेट्रोलियम पदार्थमा गरिएको मूल्यबृद्धि तथा महङ्गी विरुद्ध नेकपाले भोलि नेपाल बन्दको आह्वान गरेको छ ।
नेपाल बन्द सफल पार्न पूर्वनिर्धारित कार्यक्रमअनुसार नेकपाका कार्यकर्ताहरुले काठमाडौंसहित देशभर मशाल जुलुस गरेका छन् । उनीहरुले सरकारविरुद्ध चर्का नाराबाजी गर्दै नेपाल बन्द सफल पार्न आह्वान गरेका छन् ।
काठमाडौँ महानगरपालिकाको क्षेत्रपाटीमा, दक्षिणकाली नगरपालिकाको फर्पिङ बजारमा, चन्द्रागिरी नगरपालिकाको थानकोटमा, नागार्जुन नगरको डाडापौवा, तारकेश्वर नगरको सेषमती, टोखा नगरपालिकाको टोखा बजार मसाल जुलुस गरेको छ ।
त्यसैगरी बुढानिलकण्ठको कपन क्षेत्रमा, साँखु नगरको साँखु बजारमा बन्दको पूर्वसन्ध्यामा मसाल जुलुस गरेको छ । मसाल जुलुसपछि भएको कोणसभाहरुमा बोल्ने वक्ताहरुले भोलिको नेपाल बन्द सबैको सरोकारको विषय भएकाले बन्दलाई सफल पार्न सबैलाई आग्रह गरेका छन ।
त्यसैगरी कैलाली, अछाम, सुर्खेत, दाङ, बुटवल, धरानलगायत देशभरका मुख्य शहर र जिल्लाका विभिन्न स्थानमा सोमबार साँझ मशाल जुलुस निकालिएको छ ।