काठमाडौं । इराकका प्रधानमन्त्री मुस्तफा अल कदीमीको निवासमा ड्रोन हमला भएको छ । आइतबार बिहान वि स्फोट पदार्थसहितको ड्रोन हमला गरिएको समाचार एजेन्सी रोयटर्सले जनाएको छ ।
हमलामा प्रधानमन्त्रीको निवासलाई लक्षित गरिएको हो । इराकी सेनाले प्रधानमन्त्रीको हत्या गर्ने उद्देश्यसहित हमला गरिएको थियो तर उनी सुरक्षित रहेको जानकारी दिएको बीबीसीले जनाएको छ । इराकी सेनाद्वारा जारी विज्ञप्तिमा हमला इराकको राजधानी बगदादको ग्रीन जोन क्षेत्रमा भएको थियो । योभन्दा थप जानकारी उपलब्ध गराइएको छैन ।
सरकारका दुई अधिकारीलाई उद्धृत गर्दै रोयटर्सले प्रधानमन्त्रीको निवासमा कम्तीमा एउटा विस्फोट भएको थियो । उनीहरूले पनि प्रधानमन्त्री सुरक्षित रहेको पुष्टि गरेका छन् ।
यसैबीच प्रधानमन्त्री अल कदीमीले आफ्नो आधिकारिक ट्वीटर अकाउन्टबाट आफू सुरक्षित रहेको बताउँदै शान्ति कायम राख्न अपिल गरेका छन् ।
हालसम्म कुनै पनि संगठनले आक्रमणको जिम्मेवारी दिएको छैन तर पश्चिमा अधिकारीहरुले इरान समर्थित विद्रोही संगठनहरुले हमला गरेको हुन सक्ने बताएका छन् । ग्रीन जोनमा बसोबास गर्ने पश्चिमी देशका राजदूतहरूले सो क्षेत्रमा विस्फोट र गोलाबारीको आवाज सुनेको बताएका छन् ।
केही दिन यता ग्रीन जोनबाहिर ईरानसमर्थित संगठनका समर्थकहरूले सरकारविरुद्ध प्रदर्शन गरिरहेका छन् ।
