सुर्खेत । कर्णाली प्रदेशका नवनियुक्त मुख्यमन्त्री जीवनबहादुर शाहीले आज मन्त्रिमण्डल विस्तार गर्ने तयारी गरेका छन् । महेन्द्र बहादुर शाहीले राजिनामा दिएपछि मुख्यमन्त्री नियुक्त भएका शाहीले मंगलबार पद तथा गोपनीयताको शपथ लिएका थिए ।
नेपाली काँग्रेसका प्रदेशसभा दलका नेता समेत रहेका शाहीलाई प्रदेश प्रमुख कलौनीले संविधानको धारा १६८ (२) अनुसार मंगलबार बेलुका नै मुख्यमन्त्री नियुक्त गरेका हुन् ।
सत्ता गठबन्धन दलहरुले मन्त्रीको टुंगो लगाउन नसकेका कारण मंगलबार कुनै पनि मन्त्री नियक्ति हुन सकेको थिएन । शाहीलाई मंगलबार प्रदेश प्रमुख गोविन्दप्रसाद कलौनीले शपथ गराएका थिए ।
मुख्यमन्त्री शाहीले मंगलबार नै सानो आकारको मन्त्रिपरिषद्समेत बनाउने प्रयास गरेका थिए । सत्ता गठबन्धनका दलहरूबीच मन्त्रालय भागबण्डाका विषयमा सहमति जुट्न सकेको छैन ।
मुख्यमन्त्री शाहीले मन्त्रिमण्डल विस्तारको लागि मंगलबार नै नेकपा माओवादी केन्दका संसदीय दलका नेता महेन्द्रबहादुर शाहीसँग मन्त्रिपरिषद् विस्तारबारे छलफल गरेका थिए ।
कर्णालीमा नयाँ सरकारमा कांग्रेस, माओवादी केन्द्र र एकीकृत समाजवादीले कति वटा मन्त्रालय लिने भन्नेबारेमा टुंगो लागेको छैन ।
मुख्यमन्त्री शाहीले आज सानो आकारको भएपनि मन्त्रिमण्डल विस्तारको तयारी गरेको बताइएको छ ।
