काठमाडौं । कर्णाली प्रदेशका मुख्यमन्त्री महेन्द्रबहादुर शाहीले राजीनामा दिएका छन् । विश्वासको मत लिँदा नेपाली काँग्रेससँग भएको आलोपालो सहमतिका आधारमा शाहीले राजिनामा दिएका हुन् ।
शाही २०७४ सालमा प्रदेशसभा निर्वाचनपछि मुख्यमन्त्री नियुक्त भएका हुन् । उनको ३ वर्ष ८ महिना कार्यकाल विवादित नै रह्यो । नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टीलगायतका दलको गठबन्धनको सहमति बमोजिम उनले मुख्यमन्त्री पदबाट राजीनामा दिएका छन् ।
पूर्वसहमित अनुसार अब नेपाली काँग्रेसका प्रदेशसभा दलका नेता जीवन बहादुर शाही मुख्यमन्त्री बन्ने भएका छन् । सत्तापक्षको केन्द्रमा पनि नेपाली काँग्रेसको नेतृत्वमा नयाँ सरकार गठन गर्ने सहमति भइसकेको छ ।
सोमबार मुख्यमन्त्री शाहीले कर्णालीबासीका नाममा सम्बोधन गर्दै आफ्नो सरकारले गरेका कामको विवरण प्रस्तुत गरे र राजीनामा घोषणा गरे ।
मुख्यमन्त्री शाहीले नेपाली कांग्रेसको नेतृत्वमा सरकार गठनका लागि आफूले राजीनामा दिएको बताए । आफूले दलहरुबीच भएको सहमति अनुसार नयाँ सरकारका गठनका लागि मार्गप्रशस्त गरेर इमानको राजनीति गरेको पनि दावी गरे ।
