काठमाडौं । आजबाट काठमाडौंमा कोरोनाविरुद्धको अष्ट्राजेनेका खोपको दोस्रो मात्रा लगाउन सुरु भएको छ । काठमाडौं महानगरपालिकासहित आठवटै नगरपालिकामा आजबाट खोप लगाउन थालिएको स्वास्थ्य कार्यालयले जनाएको छ ।
अष्ट्राजेनेका खोपको पहिलो मात्रा लगाएका १८ वर्ष माथिका नागरिकहरुलाई दोस्रो मात्रा लगाउन लागिएको स्वास्थ्य कार्यालयले जनाएको छ । काठमाडौं महानगरपालिका, कीर्तिपुर नगरपालिका, चन्द्रागिरि नगरपालिका, नागार्जुन नगरपालिका, कागेश्वरी मनोहरा नगरपालिका, तारकेश्वर नगरपालिका, टोखा नगरपालिका र गोकर्णेश्वर नगरपालिकामा अष्ट्राजेनेकाको दोस्रो डोज लगाइनेछ ।
काठमाडौं महानगरपालिकाको हकमा बीर अस्पताल, वीरेन्द्र सैनिक अस्पताल, नेपाल प्रहरी अस्पताल, परोपकार प्रसूति अस्पताल, निजामती कर्मचारी अस्पताल (सिभिल अस्पताल)बाट पनि खोप लगाउन सकिने छ ।
अस्पतालहरुमा आज र भोलि दुई दिन खोप कार्यक्रम राखिएको छ भने पालिकाले तोकेका खोप केन्द्रहरुमा भने आजबाट तीन दिनसम्म खोप कार्यक्रम सन्चालन हुनेछ । खोपको दोस्रो मात्रा लगाउन जाँदा पहिलो मात्रा खोप लगाउँदा दिइएको खोप कार्ड बोक्न स्वास्थ्य कार्यालयले आग्रह गरेको छ ।