विराटनगर । प्रदेश १ का मुख्यमन्त्री भीम आचार्यले संसद सचिवालयमा दर्ता गरेको विश्वासको मत सम्बन्धी प्रस्ताव आज पेश हुने भएको छ । आज बस्न लागेको प्रदेशसभाको नवौं तथा हिउँदे अधिवेशनको तेस्रो बैठकमा सो प्रस्ताव पेश गर्ने कार्यसूची छ ।
आज दिउँसो १ बजे प्रदेशसभाको बैठक बस्दैछ । मुख्यमन्त्री आचार्यले असोज २५ गते सचिवालयमा विश्वासको मत सम्बन्धी प्रस्ताव दर्ता गराएका थिए । भदौ १० गते मुख्यमन्त्री नियुक्त भएका आचार्यले विश्वासको मत लिने सम्बन्धी प्रस्ताव दर्ता गराएका थिए । शुक्रबार बस्ने बैठकमा सो प्रस्ताव टेवल गरेपछि छलफलको प्रकृयामा जानेछ । शुक्रबारको बैठकमा छलफल गरेर मतदान भने केही दिन पर सार्ने सत्ता पक्षको तयारी छ ।
बिहीबार बसेको बाग्मती प्रदेशको बैठकले विश्वासको मतसम्बन्धी छलफल भए पनि मतदान गर्ने मिति एक साताका लागि सरेको थियो । प्रदेश १ मा शुक्रबार प्रस्ताव टेवल गर्ने र छलफलपछि मतदानको मिति केही दिन पर सार्ने तयारी भएको हो । संसद सचिवालय स्रोतका अनुसार आइतबार मतदान हुनसक्छ ।
दल विभाजन भएको एक महिनाभित्र विश्वासको मत लिनुपर्ने संवैधानिक बाध्यता भए पनि मुख्यमन्त्री आचार्यले संसद छलेर धमाधम राजनीतिक नियुक्ति गरेका छन् ।
नेकपा एमालेले प्रदेश सरकार एक हप्ता लम्ब्याएर केही राजनीतिक नियुक्त गर्न चाहिरहेको छ । त्यसैले एमालेले आजको बैठक पनि एक हप्ता सार्न आग्रह गरेको छ ।
