काठमाडौँ । प्रधानमन्त्री शेरबहादुर देउवाले मन्त्रिमण्डल विस्तारको तयारी गरेका छन् । सत्ता गठबन्धन दलहरुबीच मन्त्रीको भागबण्ड मिलेपछि देउवाले तयारी गरेका हुन् । बालुवाटार स्रोतका अनुसार प्रधानमन्त्री देउवाले भोलिसम्म मन्त्रिमण्डललाई पूर्णता दिइसक्ने छन् ।
यसैबीच सत्ता गठबन्धन दलहरुले आफ्नो तर्फबाट सरकारमा सहभागी हुने मन्त्रीको नामको आजै टुंगो लगाउने गरी छलफल थालेका छन् । मन्त्रीका आकांक्षी धेरै भएकाले शिर्ष नेताहरुलाई नेताहरुलाई मनाउन हम्मेहम्मे परेको छ । मन्त्रीको नामको अन्तिम टुंगो लगाउन नेकपा माओवादी केन्द्र र जनता समाजवादी पार्टीले आज बैठक बोलाएका छन् ।
माओवादी केन्द्रले आज दिउँसो १ बजे स्थायी कमिटी बैठक बोलाएको छ । माओवादी केन्द्रका कार्यालय सचिव श्रीराम ढकालले बैठकमा समसामयिक राजनीतिका साथै पार्टीका विभिन्न विभाग, आयोग, मञ्च लगायतको पूर्णता दिनेबारे छलफल हुने बताए ।
यसैबीच मन्त्रीको नाम चयन लगायतका विषयमा मतदण्ड बनाउन जनता समाजवादी पार्टी नेपालले कार्यकारिणी समितिको बैठक बोलाएको छ ।
चार जना मन्त्री पाउने भएपछि जसपाले नेताहरुलाई मनाउन अध्यक्ष उपेन्द्र यादवलाई गारो भएकाले बैठकबाटै टुंगो लगाउने भएको छ । यसअघि मन्त्रीको नाम छान्ने जिम्मा अध्यक्ष यादवलाई दिइएको थियो ।
बैठकले सरकारमा सहभागी हुनेबारे मापदण्ड बनाउने बताइएको छ । म्याण्डेट लिन अध्यक्ष यादवले बैठक बोलाएका हुन् ।
जसपाले भौतिक पूर्वाधार तथा यतायात, वन तथा वतावरण, संघीय मामिला तथा समान्य प्रशासन र कृषि तथा पशुपन्छी विकास मन्त्रालय पाएको छ । जसपा नेपालमा मन्त्रीका आकांक्षी धेरै छन् । सुरुमा ८ मन्त्रालयको दाबी गरेको जसपाले ६ भएपनि चित्त बुझाउने बताएको थियो । तर, गठबन्धन दलहरुबीच जसपाले चार मन्त्रालय पाउने सहमति भएको छ ।
