काठमाडौँ । नेपाल कम्युनिस्ट पार्टीको केन्द्रीय समिति बैठक आजबाट सुरु हुँदैछ । थप गरिएको केन्द्री समिति र जेलबाट निस्केका सबै केन्द्रीय समिति सदस्यहरु बैठकको लागि तनहुँको बन्दीपुर पुगेका छन् ।
केन्द्रीय समिति बैठकका एजेण्डा तय गर्न विहीबार सचिवालय बैठक बसेको थियो । महासचिव विप्लवलसहित पाँच सदस्य सदस्यीय सचिवालय बैठकले पार्टीका आगामी कार्यक्रम, महाधिवेशन, सरकारसँग गरेको तीन बुँदे सहमतिलगायतका विषय बैठकका एजेण्डा तय गरेको बताइएको छ ।
बैठकमा पेश गर्न महासचिवले तयार गरेको राजनीतिक प्रतिवेदन अध्ययनको लागि केन्द्रीय सदस्यलाई वितरण गरिएको छ ।
यो समाचार तयार पार्दासम्म बैठक औपचारिक रुपमा सुरु भएको छैन् । बैठक सुरु गर्नुअघि सचिवालयका सदस्यहरुबीच छलफल जारी छ । सचिवालयमा महासचिवसहित प्रवक्ता प्रकाण्ड, धर्मेन्द्र बास्तोला, सुदर्शन र सन्तोष बुढा छन् ।
नेकपाको ११ औं पूर्ण बैठक अहिलेको राजनीतिक परिस्थिति र अबको रणनीति तयार गर्दै समापन हुनेछ ।
सरकारले २०७५ फागुन २८ प्रतिवन्ध लगाएपछि सबै केन्द्रीय सदस्य सहभागी भएको पहिलो बैठक हो । प्रतिबन्धका बीचमा भएका बैठकमा केही नेताहरु जेलमा थिए । सरकारसँग तीन बुँदे सहमतिपछि बसेको बैठकमा पनि केही नेताहरु जेलमै थिए भने थप गरिएका नेताहरु पहिलो पटक बैठकमा सहभागी भएका छन् ।
