काठमाडौँ । भारी वर्षाका कारण राजधानी काठमाडौ उपत्यकाका अधिकांश क्षेत्र डुबानमा परेका छन् । गएरातिदेखि लगातार रुपमा बर्षा भइरहेको छ । अबिरल बर्षासँगै काठमाडौँका धेरैजसो ठाउँ डुबानमा परेका छन् ।
कागमती, विष्णुमति, मनोहरालगायतका नदी तथा खोला किनारका बस्तमा बाढी पसेको छ । बल्खुलगायतका क्षेत्रमा पनि बाढीले क्षति पुर्याएको छ । बल्खुमा पार्किङमा राखेका सवारी साधान समेत बाढीले बगाएको प्रहरीले बताएको छ ।
डुबान क्षेत्रमा रातिबाट नै सुरक्षाकर्मी परिचालन गरी उद्धार कार्य सुरु गरिएको प्रहरीले जनाएको छ । प्रहरीका अनुसार मनोहरा खोला किनारमा रहेको मूलपानीको बस्ती, काँडाघारी र बल्खु क्षेत्र डुबानमा परेको छ ।
अविरल वर्षाका कारण काठमाडौँको खोला छेउका सुकुम्वासी बस्ती र होचो ठाउँ डुबानमा परेको थियो । डुबानबाट मानवीय र भौतिक क्षति भएको छैन । त्यस्तै, टंकेश्वर, डल्लु, टेकु, तहाचल, वनस्पति चोक, नयाँ बसपार्क, परोपकार केन्द्र, माछापोखरी, गुह्येश्वरी, जोरपाटी र कालोपुललगायतका क्षेत्र डुबानमा परेका छन् ।
बाढीले ३८२ घरधुरी डुबानमा परेको महानगरीय प्रहरी कार्यालयले जनाएको छ । प्रहरीले डुबान क्षेत्रबाट करिब दुई जनाको सकुशल उद्धार गरेको छ । धेरै क्षतिमा डुबानमा परेपनि अहिलेसम्म मानवीय क्षति भने भएको छैन । घर भत्किँदा रोल्पामा दुई र जाजकोटमा एक जनाको ज्यान गएको छ ।
रोल्पा नगरपालिका वडा नम्बर १० थवाङमा गएराति पहिरोले घर पुरिँदा ७० वर्षीया गौरी थापा र उनका पाँच वर्षका नातिको ज्यान गएको छ । पहिरोमा पुरिँदा थापाका छोरा र बुहारी घाइते भएका छन् । घटनास्थलमा प्रहरीको टोली पुगेको छ ।